Республиканың Баштыңы Владислав Ховалыгның удуртулгазы-биле болган Аппарат хуралынга онза байдалдар болгаш корум-чурум камгалаар органнарның төлээлери эрткен неделяның оперативтиг медээлерин чыылганнарга таныштырган. Хуралга оон ыңай күрүне албан черлеринче чоннуң киирген дилеглериниң сан-чурагайын болгаш социал тудугларда септелгелерниң тудуунуң дугайында чугаалашкан.
Россияның Онза байдалдар яамызының Тыва Республика талазы-биле кол эргелелиниң дыңнатканы-биле алырга, неделя дургузунда республика девискээринге онза байдалдар болбаан. Республикага дөрт чер шимчээшкини демдеглеттинген, амы-тынындан чарылган болгаш кемдээшкин алган улус чок, чондан хомудалдар кирбээн. Үжен бир өрт болган, өлген-даа, кемдээн-даа кижи чок.
Эрткен неделяда республикага 38 кем-херек үүлгедиишкини бүрүткеттинген. Ооң иштинде 6 аар кем-херек үүлгедиишкини бүрүткеттинген дээрзин Тыва Республиканың Иштики херектер яамызы дыңнаткан. Ооң мурнунда кылган кем-херек үүлгедиишкиннери-биле кады 21 кем-херекти тодараткан. IT-технологияларның дузазы-биле 6 кем-херек үүлгедиишкини болган. Ниитизи-биле 600 муң ажыг рубль когаралды чедирген.
Неделя дургузунда 533 дилегни эрге-чагырга органнары хүлээп алган. Эң-не хөй дилеглер Кызыл хоорайның болгаш Чеди-Хөл, Улуг-Хем кожууннарның чурттакчыларындан келген.
Бо чылын республика девискээринде 47 социал объектиде капиталдыг септелге ажылдары чоруп турар. Тыва Республиканың Күш-ажыл болгаш социал политика база Культура яамыларының хайгааралында турар объектилерде септелге эң-не бедик деңнелде.
Аппарат хуралынга онза кичээнгейни дараазында чүүлдерже угландырган: неделя дургузунда Тожу кожуунга чаңгыс, а Каа-Хемге үш чер шимчээшкинин демдеглээн. Тожуга дош адаанче кирер часкан балыкчыларны ОБЯ-ның ажылдакчылары камгалаан. Хыналдалар үезинде ниитизи-биле 670 литр бүрүткеттинмээн эзиртир суксунну хавырган. 3600 орук шимчээшкининиң хажыдыышкынын видео-хайгаарал херекселиниң дузазы-биле илереткен. Эзирик байдалга автомобиль башкарганы дээш, Тыва Республиканың ОШАЧКИ-зи ийи хамаатыга херекти оттурган. Ол хамаатылар баштайгы сагындырыгны хүлээп албайн, ийи дугаар эзирик байдалга руль артынга олурган дээрзин демдеглээн.
2026 чылда Тывага 28 социал объектиниң капиталдыг септелгези планда көрдүнген. Үш фазалыг электри шугуму дээш «Россети Сибирь Тываэнергоже» чагыгны киирип болур. «Госуслуги» күрүне ачы-дузазы платформазын таварыштыр күрүне албан черлеринче билдириишкин киирерин регионнуң чону калбаа-биле ажыглап эгелээн.
Бистиң корр.
Чурукту ТР-ниң Чазааның парлалга албанындан алган.
«Шын» №41 2025 чылдың октябрь 23