«Шын» 12+

Оран-сава ажыглалын хынаар

14 марта 2025
5

Тывада өскүс уругларның тускай чуртталга фондузунуң чурттаар оран-савазын хынаар ведомстволар аразының инвентаризация комиссиязын тургускан. Республиканың Баштыңы Владислав Ховалыг ол дугайында Айтыышкынга атты эрткен неделяда салган.

Күрүнеден социал хөлезилелге чурттаар оран-сава алган өскүс кижи бүрүзүнге чедип, хоойлу езугаар оларның ээлериниң эрге-ажыы хажыттынмаанын, бажыңын ажыглаарынга кым-даа шаптыктавайн турарын хынап, ооң ээлериниң амыдырал-чуртталга байдалы экижип келгенин хынаары– комиссияның кол сорулгазы.

Комиссия инвентаризация ажылын чорудуп тургаш, хөлезиде алган бажыңнарының документилеринге, коммунал ачы-дуза дээш төлевирлер болгаш оран-саваларны ажаап-карактаар талазы-биле тургустунган айтырыгларны чурумчудар. Ылаңгыя чурттакчылар-биле социал хөлезилел керээни тургусканының шынныын, ээлериниң чуртталга дүрүмнерин сагып турарын хынап, өскүс уруглар-биле чурттап турар кижилерниң даңзызын тодарадыр. Бажыңны хөлезилеп турар харыысалгалыг кижилер 5 чыл чурттаан соонда, социал чуртталга бажыңын хуужудуп алыр эргези барын тайылбырлаар.

Ажаалда-тежээлде болгаш харагалзал ажыл-чорудулгазын хайгаарап турар комиссияны Тываның өөредилге сайыдының оралакчызы удуртурун томуйлаан. Комиссияның составында Өөредилге яамызының төлээлеринден аңгыда, ТР-ниң Тудуг яамызындан база Чер болгаш өнчү яамызындан, тус чер чагырга органнарындан специалистер кирип турар.

А. МОНГУШ.

«Шын» №9 2025 чылдың март 13

ШЫН Редакция