«Шын» 12+

Оруктуң септелгезин уламчылаар

21 июня 2023
38

“Айыыл чок шынарлыг оруктар” национал төлевилелдиң акша-хөреңгизи-биле Сүт-Хөл кожуунда автооруктарның апрель айда-ла эгелээн септелгези уламчылап турар. Оруктуң бо кезээнде бүгү ажылдарны «Строй-Экспресс» КХН чорудуп турар. Септээр оруктуң узуну 9 километр.


«Россияда-даа, Тывада-даа септеттинген оруктарның саны чыл санында өзүп олурар. Республиканың чурттакчы чонундан кирген санал-оналдар ажыл-ишке мурнады көөр угланыышкыннар болур. Орук ажылдарының программазын хевирлеп тура, ол бүгүнү ыяап-ла өөренип көрген. Ук орукту Алдан-Маадырларның тура халыышкынының 140 чылдаанының байырлаашкынының иштинге чорудуп турар” — деп, Тыва Республиканың орук болгаш транспорт сайыды Шораан Чыргал-оол чугаалап турар.

Бо хүннерде керээлиг организация чер кырының довураан тарадыр эжип, сай-элезинни төп эгелээн. Ажылдар бадылаттынган чурум езугаар чоруттунуп турар. Септелгеде 50 хире ажылчын болгаш 25 орук техниказы ажылдап турар.

Россияның Президентизи Владимир Путин 12 национал төлевилелди чарлаан. Ол болза «Демография», «Культура», «Кадык камгалалы», «Өөредилге», «Чурттаар бажың-балгат болгаш хоорай хүрээлели», «Экология», “Айыыл чок шынарлыг оруктар”, «Күш-ажылдың бүдүрүкчүлүү болгаш чонну ажылга хаара тударын деткиири», «Эртем», «Чурагайлыг экономика», «Биче болгаш ортумак сайгарлыкчы чорук», «Бүгү-делегей кооперациязы болгаш экспорт» деп төлевилелдер-дир. Оларның кол сорулгазы – российжи хамааты болгаш өг-бүле бүрүзүнүң амыдыралын боттуу-биле эки талаже өскертири болур.

/ А. ХЕРТЕК белеткээн.
Чуруктарны интернеттен алган.

"Шын" №45 2023 чылдың июнь 21

ШЫН Редакция