Орус географтыг ниитилелдиң Тыва Республикада салбыры ооң кураторлар чөвүлелиниң деткимчези-биле «Тываның школаларынга Орус географтыг ниитилелдиң булуңу» төлевилелди боттандырып эгелээн.
Ол булуңда Орус географтыг ниитилелдиң тугун азып, улуг глобусту тургузуп, ханага ниитилелдиң дугайында таныштырылганы дерээн. Ноябрь 30-де Шагаан-Арыг хоорайның 2 дугаар школазының коллективинге бир дугаар «булуң» ажыттынган.
Школа Орус географтыг ниитилелдиң Тыва салбыры-биле каш чылдар дургузунда сырый харылзаалыг ажылдап, аныяктар шимчээшкинин сайзыраткан: школачылар Енисей хүнү, географтыг диктант, география кичээли база оон-даа өске төлевилелдерде чылдың-на идепкейлиг киржип турар.
Тыва салбырның даргазы Кара-кыс Аракчаа биле күүсекчи директору Эдгар Байкара өөредилге организациязының 95 чылдаан юбилейиниң үезинде школаның удуртулгазынга “ОГН булуңун” байырлыг байдалга ажыткан.
Юбилейлиг хуралда школачылар болгаш башкылар коллективи концерт көргүскен. Чыылганнар школаның национал оркестриниң составында бичии барабанчының оюнун сонуургаан. Кара-кыс Донгаковна ОГН-ниң юбилейлиг хөрек демдээн ол уругга тывыскан. «Тывада чаңгыс алдарлыг барабанчы кыс – Байлак Монгуш бар, ам ийи дугаары өзүп олурары онза-дыр!» — деп, ол демдеглээн.
ТР-ниң Чазааның парлалга албаны.
«Шын» №93 2024 чылдың декабрь 4