Санаторий-курорттарга эмнедип чораан 335 кижиниӊ аай-дедир оруунуӊ өртээн төлеп берген. Шак ындыг сорулгаларга 2023 чылда 7 миллион ажыг рубль үндүрер дээрзин Тывада Социал фондунуӊ салбыры медеглээн.
Федералдыг болгаш регионалдыг чиигелде деп ийи аӊгы болур. Регионалдыг чиигелде дээрге чүгле чурттап турар черинде социал камгалал албаныныӊ талазындан ачы-дузазы-дыр. Федералдыг чиигелде дээрге күрүне бюджединде көрдүнген ачы-дуза болур. Бо чиигелде бүгү чурттуӊ девискээринге күштүг болур.
Чижээлээрге, федералдыг чиигелде алыр улус дараазында «Бөлүк социал хандырылганы» боттуу-биле алыр эргелиг:
- Эмчиниӊ берген рецептизи-биле халас эм алыр;
- Инвалид уругларныӊ тускай аъш-чеми, медицина херекселин халас алыр;
- Санаторий-курортка эмнедири-биле халас путёвка алыр;
- Хоорай кыдыында черлерге демир-орукка халас аргыжар;
- Өске хоорайда эмнедир черинге барып чедер аай-дедир оруу халас болур.
Регионнуӊ Кадык камгалал яамызыныӊ бижии-биле кайы-бир хоорайда санаторий-курортка эмнедип алыр дээн болза, орук чоруур документилерин Социал фондуга кылдырар ужурлуг.
Чиигелде алыр кижиниӊ билдириишкинин, ооӊ бодунуӊ азы ооӊ бүзүрелдиг төлээзиниӊ паспортун, Кадык камгалал яамызыныӊ берген хоолгазын, орук чоруур № 2 талоннуӊ бодун көргүзер.
Билдириишкинни Госуслуга порталындан чорудуп болур. ТР-де Социал фонд салбырыныӊ клиентилер-биле ажылдаар албанынга боду чеде бергеш, дужаап болур.
Социал фонд билдириишкинни сайгарып көргеш, федералдыг чиигелде-биле орук чоруур документини (талонну) ап бээр.
Самолет-биле чоруур деп турар болза, авиабилет садып алыр мурнунда авиакомпания-биле дорт харылзажыры чугула. Поездилеп чоруур дээн болза, Россияныӊ демир-орук сайтызынга бүрүткедип алгаш, чоруур маршрудун, ай-хүнүн, поездиниӊ вагонун, олудун шилип алыр.
Чиигелдези-биле билет алырын ол сервистер саналдаарга, Социал фондунуӊ берген орук талонунуӊ дугаарын, паспорт биле СНИЛС медээлерин киир бижиир.
Билетти кассадан садып алырынга чаӊчыга берген болза, кассирге чеде бергеш, «Чиигелделиг мен» — деп чугаалааш, талонунуӊ дугаарын айтып бээр.
Хоорайлар аразынга аргыжар автотранспорт-биле чоруурда, Социал фондунуӊ берген документизин кассага көргүскеш, ону билет-биле орнап алыр.
«Бөлүк социал хандырылгадан» ойталааш, ооӊ орнунга акша-хөреӊги алырын шиитпирлээн улус орукка халас чоруур чиигелдени ажыглап шыдавас.
Социал фондудан талон албайн, боттары билет садып алган улустуӊ орук чарыгдалыныӊ өртээниӊ орнун төлеп бээри хоойлужудулгада көрдүнмээн.
Регионалдыг контакт-төвүнүӊ харылзажыр телефону: 8-800-200-0543.
/ Р. ДЕМЧИК белеткээн.
Чурукту интернет четкизинден алган.
"Шын" №35 2023 чылдың май 17