Школачыларның чайгы дыштанылгазы эгелээн. Июнь 1-ден тура республиканың хүндүскү лагерьлери ажыттынган, а стационар лагерьлер келир неделяда, июнь 15-те, ажылын эгелээр. ТР-ниң Өөредилге яамызының медээзи-биле алырга, бо чылын республикага ниитизи-биле 159 хүндүскү, 1 майгын база 20 стационар лагерь ажылдаар. Аңаа немей бо чылын Ийи-Талда аграр школаның баазазында «Орлята» деп лагерь база ажыттынган.
Ол ышкаш республикада 121 Культура бажыңында, 22 ном саңында, шупту 143 түр үениң дыштанылга төптеринге уругларны база элээдилерни хаара тудар.
Республиканың мурнуу чүгүнде, кыдыг кызыгаар Эрзин кожуунда бо талазы-биле кандыг ажылдар кылдынып турарын тус черниң өөредилге эргелелинден сонуургадывыс.
Эрзин кожууннуң өөредилге эргелелиниң начальниги Александр Кур: «Бо чылын Эрзин кожуунга ниитизи-биле 3 школа чанының база чаңгыс стационар лагерь ажылдаар. Мөрен, Кызыл-Сылдыс база Бай-Даг школаларының баазазынга болгаш «Отчугаш» лагерьге 670 хире уругну хаара тудар бис. Нарын школазының баазазынга лагерьни июль 1-де ажыдар, чүге дизе ында күрүне шылгалдалары чоруп турар. А кожуун төвүнде Эрзин школазында капиталдыг септелге чоруп турар, ынчангаш аңаа бо чайын хүндүскү лагерь ажылдавас.
Нарын суурдан 3 км хире черде «Отчугаш» деп стационар лагерь бар. Ол июнь 15-те ажыттынар. Аңаа ажылдаар башкылар, эмчилер болгаш ажылдакчылар четчеленген. Студентилерни база ажылче хаара тудар бис. Стационар лагерьге дыштаныр путёвканың өртээ 8 муң рубль, ол дээрге чүгле тус черниң уруларынга доктааткан өртек-тир, школа чанының лагерьлериниң 2 500 рубль».
Эрзин кожууннуң «Отчугаш» лагери республикада эки ажылдыг лагерьлерге санадып турар, ооң республика чергелиг шаңналдары хөй. Чижээ, эрткен 2023 чылда орук шимчээшкининиң айыыл чок чоруунуң талазы-биле мөөрейге республиканың 6 стационар лагерниң аразынга тергиидээн деп, өөредилге эргелелиниң начальнигиниң кижизидилге талазы-биле оралакчызы Диана Борбак-оол чугаалады:
«Кожууннуң «Отчугаш» лагерин хөй чылдар дургузунда дуржулгалыг башкы Байлак Дамдын-Сүрүновна Ендан удуртуп турар. Лагерьге ниитизи-биле 180 уруг дыштаныр, бир сезонда — 60 уруг. Бирги сезонда амыдыралы чегей өг-бүлелерниң ажы-төлүн — 37, назы четпээннер учёдунда турар 23 уругну дыштандырары көрдүнген. Дараазында 2-ги, 3-кү сезоннарда тускай шериг операциязының киржикчилериниң 18 ажы-төлүн халас дыштандырар.
Лагерьниң материал-техниктиг баазазын чылдың-на чаартып турар. Бо чылын аңаа улуг веранда немежир. Уругларның арыгланыр черинде изиг-соок сугну киирген. Үш чыл бурунгаар чаа чунар-бажыңны-даа кылган. Амгы үеде лагерьниң ажыдыышкынынга белеткел ажылдары чоруп турар».
«Отчугашка» уруглар дыка дыштаныксаар, «Келир чылын база кээр бис» деп сеткил-сагыжы ханган чанарлар" – деп, Диана Валерьевна чугаазын доосту.
Алдынай СОЯН.
Чуруктарны интернеттен алган.
"Шын" №43 2024 чылдың июнь 12