Таңды кожууннуң Оңгар-Хову деп черде “Евраз” хөмүр-даш уургайының чанынга хову өртү үнген дугайында дүвүренчиг дыңнадыг дүүн, август 26-да, 21.35 шак турда Таңды кожууннуң ЕДДС албанының башкарылга пунктузунче “112” системазындан келген. Өрт халавы үнген черже техникалыг болгаш дериг-херекселдерлиг өрт-камгалал кезектериниң ажылдакчылары, эки турачы өрт өжүрер командаларның кежигүннери, кожуун чагырыкчызы Алик Монгушка баштаткан кожуун чагыргазының, ооң эргелелдериниң ажылдакчылары – шупту 60 ажыг кижи халдып үнүпкеннер.
01.15 шак үези турда өрттү чавырылдырган болгаш бир шак ажыг хире үе эрткенде шуут өжүрүп каапкан. Өрт үнгениниң чылдагааннары тодараттынып турар. Ук девискээрни дежурный бөлүктер патрульдап, хыналда адаанда алган.
“Өрт өжүрер дээш маадырлыы-биле халдып үнгеш, Оңгар-Ховуда тараа шөлдерин камгалап алган бистиң эрес-дидим дайынчыларывыска өөрүп четтиргеним илередип тур мен! – деп Таңды кожууннуң чагыргызанаң даргазы Алик Монгуш дыңнаткан. – Ол дээрге Эмер-оол Сапыянакович, Филат Анатольевич, Назын Иванович, Омак Мергенович, Эргил Мергенович, Владик Радиславович дээш өске-даа албан-организация черлериниң оолдары-дыр”.
М. Сандан.
Чурукту интернеттен алган.