Чаа чыл чоокшулаан, хоорай байырланчыг шинчи кирип эгелээн. Найысылал Кызылга 30 ажыг чыл чурттааш, эрткен чылын хоорайның Титова кудумчузунда хөй аал чурттаар бажыңда көжүп келдим. Хоорайның төвү болгаш, каът бажыңнарның, кудумчуларның байдалы, чырыдылгазы, чаагайжыдылгазы ылгалдыг-дыр.
Мурнунда Восток микрорайонунга чурттап тургаш, хоорайның арыг-силиин шоолуг-даа херекке албайн турган мен, ам бо кыш дүжерге найысылалдың кудумчуларының харын чүге үе-шаанда аштавайн турар ирги деп бодай бээр апардым. Чайгы-даа үеде база ындыг, арыг-силиг талазы-биле кажан-даа эки турбаан. Канчаарга-даа найысылалдың төвү ышкажыл, аалчылар келгеш бистиң хир-чудувусту көөр бе? Чүгле автобустар доктаамнарын бичии аштап каан боор-дур. Кудумчулар кыдыгларында харлар ай-айы-биле овааланы берген, улуг даг ышкаш апарган кыштадыр турар-дыр. Чуртталга-коммунал ажыл-агыйының, хоорай мэриязының ажылдакчылары ону эскербейн турар бе? Ажылдаар кижилер чок бе азы? Аныяктар кара ажыл кылыксавас апарган үе-дир бо. Мен пенсионер кижи-дир мен, херек болза бодум-даа дворниктеп ажылдазымза деп бодай бээр мен.
/ Серекей МАЖАА.
Кызыл хоорай.
Чурукту интернет четкизинден алган.
“Шын” №99 2024 чылдың декабрь 25