Далашкаш...
Бир катап Белек-оол ажылынче далажыр дээш, ийи дөмей хаптыг үнген. Бирээзинде – бок, өскезинде – ажылынга солуп кедер хеви. Ол телефонунга чугаалажып чорааш, бир хавын бок октаар контейнерже октапкан. Улаштыр чоруп ора, боктуг хавын тудуп алган чоруурун эскерип каан. Белек-оол дедир контейнерге кээп, үженип кирипкен. Бомжтар-биле удур-дедир багайтыр кайгажып, октапкан хавын тып алган.
Чааскаанзыргай сандай
Өөреникчилер культура одаанга фестиваль көрүп олурганнар.
Сценажыткан көргүзүг "Чаасканзыргай сандай" деп, башкарыкчы чарлаан соонда, бир оол сценаже сандай үндүрүп салып каан. Көрүкчүлер кым-на үнүп кээр ирги дээш, манап-ла олурган. Беш, алды-даа минута эрткен, сураг. Сценада чүгле сандай. Зал ишти шып-ла шыпшың. Шупту кичээнгейлиг көрүп-ле олурганнар. Ам черле дыка солун чүве болур боор дээш, шупту манаан. Думаазын тыртар кижи-даа чок. Карактар чүгле сандайда. Ол аразында башкарыкчы үнүп келгеш:
– Кичээнгейлиг көргениңер дээш четтирдивис! – дээш, сандайны аппарган. Кезек када шимээн чок олуруп-олуруп, частыышкын үнген-биле дөмей зал ишти чир-шоң дүшкен. Каттырар дээш ыглаар чыгыы-даа улус бар. Беш-даа минута чедир каткы-итки чайтылаан. Чүгле артында олурган кырганнар: "Чүү болуп каапты?" деп бот-боттарындан айтыржып турганнар. Шупту ол сандайны каш минута иштинде дыка-ла кичээнгейлиг көрүп олурган болган.
Тос оол
Ашак машиназын кылып тургаш, кадайы садыг чоруур дээрге, "тосол" чагаан. Кадай садыгланып алгаш, ашааның чагыын сактып келген: “Ам тос оолду кайыын чыып алыр кижи боор мен? Адыр шыкта бут бөмбүү ойнаан оолдарны дилеп көрейн'' дээш, чеде бээрге, шынап-ла, оолдар бөмбүктээн турганнар. Шала улуг-шыырак оолдарны “Кырган ашакка машиназын кылырынга дузалажып көрүңер, оолдарым. Тос оол эккел дээрге силерни дилээрим ол-дур ийин” – деп көгүдүп алгаш, эдертип алган. Тенекпейлер ооң соондан базыпканнар. Бажыңынга кээрге, ашаа: “Чоп чиде бээр сен? Тосолуң кайы?” – деп айтырарга, кадайы тос оолду чыскаагаш, чоргаары-биле: “Бо-ла-дыр" – дээн.
"Шын" 2023 чылдың апрель 1 №23
#Шын #Тыва #Каткы #АякШай #Далашкаш #ЧааскаанзыргайСандай #Тосоол