Чоокта чаа Тываның бир онзагай эмненир черлериниң бирээзи — «Серебрянка» санаторийге дыштаныр аас-кежиктиг болдум. Эрзин кожуундан 5 кижи аңаа барып кадыывыс быжыглап, эмненип дыштандывыс.
Хар-назынывыс улгады берген болгаш, эмчилерниң сүмези-биле эм-домнуг черге кадыывысты быжыктырып, чаа эш-өөр-биле харылзажып, янзы-бүрү оюн-тоглаага киржип, дендии-ле ажыктыг дыштандывыс. Хүннүң-не янзы-бүрү эмнээшкин процедураларын эртип турдувус. Ылаңгыя чиңнээшкин база пөш, тооруксуг чаагай чыттыг бус тындырарга, дыка таарзындым. Бисти эмнеп турар эмчилеривис Шончалай Семеновна Монгуш, Мансүрена Викторовна Монгуш, бус тындырар эмчивис Чойгана Биче-ооловна Хертек, массаж кылыр Амир Хоптак-оолович Монгуш дээш өске-даа эмчилерниң, ажылдакчыларның ажылын үнелээр-дир мен. Санаторийниң коллективиниң демниин, ажылынга бердингенин, эрес-кежээзин көргеш, ооң удуртукчузу Оксана Ивановна Гостюхинаның билдилиг ажылы-дыр деп демдеглекседим.
Амирин Алексеевич Чымба биле Эльдар Любомирович Ондар санаторийниң дыштаныкчыларынга эртениң-не сула шимчээшкиннер кылдырар, а танцы башкызы Урана Торлаевна Дулуш бисти ойнадып-хөгледип, танцы-самныг солун мөөрейлерни эрттирип турду. Танцы-сам, каткы-хөг, шимчээшкиннерден аарыг-аржыывысты уттупкан оюн-тоглаага идепкейлиг киржип турдувус.
Көдээ ажыл-агый адырынга бедик көргүзүглери дээш социалистиг чарыш тиилекчизи болуп, шаңналдарны каш удаа ап, Россияның санаторий-курорттарынга дыштанып-даа турдум. Ам назы-харым улгады-даа берзе, бүгү назынымда ажыл-ла кылып, иштенип-ле чораан болгаш, аарыг-аржыкка-даа алыспайн келдим. Украинада болуп турар тускай шериг операциязы Тываның та чеже өг-бүлелеринге хай-халап чедирбеди дээр. Мен база эрткен чылын ол хайлыг кара дайынга чараш оглум чидиргеш, кадыым баксырап аарааш, эмнелгеге чыттым. Эмнээшкинни эрткен соомда, «Серебрянкага» кадыымны быжыктырар аргалыг болганымга өөрүүр-дүр мен. Ынчангаш Эмчилер хүнү эрткен-даа болза, буянныг иштиң кижилери – ак халаттыг эмчилерге четтиргенимни илередип мөгеер-дир мен.
Чечекмаа САДИ, ТР-ниң алдарлыг ажылдакчызы.
Эрзин кожуун.
Чуруктарны авторнуң архивинден алган.
“Шын” №25 2025 чылдың июль 3