“Чаңгыс демниг Россия” политиктиг партияның Тыва регион организациязының XXVIII-ки партийжи конференциязы дүүн, март 28-те, Кызылда Улусчу чогаадылга бажыңынга болуп эрткен. Ооң мурнуу чарыында республиканың кожууннарында болгаш сумуларында тус чер эге организацияларының хуралдарын болгаш конференцияларын эрттирип, 2022 чылда кылып чоруткан ажылдарны түңнээн. XXVIII-ки партийжи конференцияга Тыва регион организациязының эрткен чылда ажылын сайгарып чугаалашкан.
“Чаңгыс демниг Россия” политиктиг партияның Чиңгине чөвүлелиниң кежигүнү, регион организациязының секретары Владислав Ховалыг конфренциязының ажылынга киришкен.
XXVIII-ки партийжи конференцияга чүгле партийжи билет каттыштырган чаңгыс партияның кежигүннери эвес, а ёзулуг российжи патриотчу, күрүнениң бүдүн-бүрүн, хамаарышпас чоруу даштыкы болгаш иштики туруштарга чаныш-сыныш чок кижилер чыылган деп Тываның Баштыңы конференцияга чугаазынга демдеглээн. 2022 чыл Россияга, ол ышкаш Тывага база нарын үе болганын ол сагындыргаш, Украинада тускай дайынчы операцияда киржип турар чаңгыс чер чурттуглары дайынчыларга республиканың чурттакчы чону аажок демниг болганын Владислав Ховалыг онзалап айыткан.
“Чаңгыс демниг Россия” политиктиг партияның ажылынга идепкейлиг киржилгези дээш Тываның Баштыңының Хүндүлел бижиин партияның Каа-Хем кожуунда тус чер салбырының күүседикчи секретары Артур Иргитке тывыскан.
2022 чылда эки ажылдаан тус черлерде партийжи организацияларга акша шаңналдарын болгаш компьютерлиг техника аймаан берген.
“Чаңгыс демниг Россия” политиктиг партияның кежигүнүнге чаа кирген Кызыл хоорайда сан-чурагайлыг эртем төвүнүң ажылдакчызы Аяс Бартан, хууда сайгарлыкчы Мурат Моңгуш дээш өскелерге-даа тывыскан.
XXVIII-ки партийжи конференцияга регион организациязының 2022 чылда ажыл-чорудулгазының дугайында илеткелди “Чаңгыс демниг Россия” политиктиг партияның Тыва регион организациязының күүседикчи комитединиң удуртукчузу Елена Ховалыг кылган.
Россияның Украинада чорудуп турары тускай дайынчы операцияның киржикчилери Тывадан дайынчыларга болгаш оларның өг-бүлелеринге республиканың чурттакчы чонунуң бүгү талазы-биле дузазын ол илеткелинге онзалап айыткан. Россияның Президентизиниң соңгулдалары чоокшулап кел чоруурун Елена Ховалыг сагындыргаш, соңгулдаларга “Чаңгыс демниг Россия” политиктиг партия шыңгыы белеткенир, аңаа кежигүн бүрүзү бодунуң үлүүн киирериниң чугулазын чугаалаан. Партийжи программа ёзугаар республикада боттандырып турар ажылдарга Елена Ховалыг доктаап, ол программаларның ачызында септеттинген школаларны, кадык камгалал албан черлерин болгаш өске-даа объектилерни адаан. 2023 чылда эң дээре партийжи эге организация, эге партийжи организацияның эң дээре секретары мөөрейлерин чарлаанын илеткелчи дыңнаткан.
“Чаңгыс демниг Россия” политиктиг партияның Тыва регион организациязының политиктиг чөвүлелин болгаш контроль комиссиязын чаартырының талазы-биле соңгулдалар XXVIII-ки партийжи конференция үезинде эрткен.
/ Ш. МОҢГУШ.
Буян ООРЖАКТЫҢ тырттырган чуруктары.
"Шын" 2023 чылдың март 29 №22
#Шын #Тыва #ТываныңБаштыңы #Тыва #Партийжиконференция #Политика #ЧаңгысдемнигРоссия
Партийжи конференция
29 марта 2023
78