Бөгүн, октябрь 12-де, «Авангард» деп өөредилге-методиктиг төптүӊ баштайгы кичээлдери эгелей берген. Келир үеде шериг бадар аныяктарны, тодаргайлаарга, 10-гу класстыӊ оолдарын аӊаа белеткээр.
– Шериг белеткелиниӊ кичээлдери 3 хүн дургузунда болур. Тактика, ок-боо, шериг топографиязы болгаш баштайгы шериг белеткелиниӊ талазы-биле өөредир. Бо ээлчегде Тожу, Бай-Тайга, Чөөн-Хемчик, Мөӊгүн-Тайга, Барыын-Хемчик кожууннардан, Ак-Довурак хоорайдан шупту 44 кижи келген. Профессионал инструкторларныӊ удуртулгазы-биле школачыларга темалыг кежээлерни эрттирер, дайынчы хөделиишкиннерниӊ хоочуннары-биле ужуражылгалар болур – деп, Тыва Республикада «Аныяк шериг» шимчээшкинниӊ регионалдыг штавыныӊ даргазы Айдыӊ Шивидек тайылбырлаан.
«Авангард» деп өөредилге-методиктиг төп 2022 чылдыӊ май 21-де ажыттынган. Баштайгы шериг белеткелинге «Аныяк шериг» шимчээшкининиӊ киржикчилеринден аӊгыда, республиканыӊ 10-гу класстарыныӊ өөреникчилери база келир. Планнатынганы ёзугаар ооӊ ээлчеглиг кичээлдери ноябрь айда болур.
TMG медээлери-биле Р.Демчик белеткээн.
Ада Түлүштүӊ тырттырган чуруктары.