Декабрь 9 — Россияда Ада-чурттуң Маадырларының хүнү. Ол хүн Республиканың К.И. Чуковский аттыг уруглар ном саңынга «Тускай шериг операциязының Маадырлары» деп патриотчу класс шагын организастаан.
Эрес-дидим чорук ордениниң Кавалери база хөй-ле шаңналдарның, медальдарның эдилекчизи, сержант, ТР-ниң чогаалчылар эвилелиниң кежигүнү, Тываның ховар, эрес-дидим, төлептиг экер-эрес оолдарының бирээзи – Вадим Чыкай-биле ужуражылга солун болуп эрткен.
Өзүп орар салгалывыс Ада-чурт Маадырларының үлегер-чижээн көрүп өзер болзун дээш, патриотчу класс шагын эрттирип, хемчегниң киржикчилери кылдыр библиотеканың активчи номчукчулары, келир үеде Ада-чуртувустуң камгалакчылары — Республиканың кадет корпузунуң өөреникчилерин база кижизидикчи башкылары Кежик Кууларны, Чимит Шалыкты чалаан.
Хүндүлүг аалчы Вадим Окчааевич бодунуң допчу намдары-биле таныштыргаш, өскен-төрээн суурунуң база дайынчы эш-өөрүнүң эрес-дидим чоруунуң дугайында чугаалап, өөреникчилерге чагыг-сүмезин берип, олар-биле чугаалажып, эки өөренирин күзээн.
Ада-чурттуң Маадырларының хүнүнде тыва маадырларывыска мөгейип турар бис. Оларның аразында шылгараңгай чаңгыс чер чурттуувус Россияның Маадыры, Тываның ёзулуг патриотчу оглу Сергей Күжүгетович Шойгуга болгаш өске-даа дайынчыларга чоргаарланып, маадырлыы-биле чок болган тыва оолдарывысты, камгалакчыларывысты сактып, чоргаарланып чоруур бис.
Маадырлыы-биле чок болган тыва дайынчыларга мөгейип, кажыыдалдың минутазын чарлап, салым-чаяанныг чурукчу Радомир Балганның чураан маадырларның портреттерин көргүскен.
2022 чылда база бир чаңгыс чер чурттуувус РФ-тиң Чепсектиг Күштериниң улуг сержантызы Мерген Очур-оолович Донгак ТШО-нуң шөлүнге дайынчы эрес-дидим, быжыг туруштуг чоруу дээш төлептиг болуп, Россияның Маадырының Алдын Сылдызы-биле шаңнаткан. Чалым Сюндюпович Чүлдүм-оол, Куулар Буян Федорович база Россияның Маадырлары .
Амгы үеде мурнуку одуругларда бистиң чаңгыс чер чурттугларывыс тулчуп турар, оларның эрес-дидими, бедик көдүрлүүшкүнү чоргааралды оттуруп чорлар. Олар боттарының дайынчы даңгыраанга шынчы болуп, ада-чурт камгалаар шериг албан-хүлээлгезин төлептии-биле күүседип чоруурлар.
Улуг күчүлүг Ада-чурттувус Россия, Тыва күрүневистиң, тыва чонувустуң чаагай келир үези дээш амы-тынын харамнанмайн, демисежип турар шериглеривиске каң кадыкты күзедивис.
Ужуражылганы аалчының чогааткан «Солдат-тыр мен» деп шүлүү-биле дооскан.
Ногаан шокар шериг хепти кеткен-даа бол,
Ногаандык дег дошкун кылдыр көстүр-даа бол,
Каржы сеткил кижилерге бодап көрбээн,
Камгалакчы солдат-тыр мен, бүзүреп чор.
Улай адар октуг боону чүктээн-даа бол,
Бачыт кылбас, амытанга хилинчек чок,
Багай эвес солдат-тыр мен, идегеп чор.
Өршээл билбес эжелекчи каржы дайын
Өскен чуртум туру базып, халдап келзе,
Өршээ бурган, мени ынчан танывас сен
Өлүр тутчур солдат-тыр мен, ынакшып чор!
Хүндүлүг аалчывыс Вадим Окчааевичиге ал-бодунга кадыкшылды, өг-бүлезинге аас-кежикти күзеп, четтиргенивисти илередип, ажыл-ижиңерге депшилгени, чогаал ажылынга чайынналчак чедиишкиннерни хөй санныг номчукчуларывыстың мурнундан күзедивис.
Сырга ОНДАР, К.И. Чуковский аттыг уруглар ном саңының килдис эргелекчизи.
Авторнуң тырттырган чуруу.
«Шын» №94 2024 чылдың декабрь 7