Ада-чурттуң Улуг дайынынга Тиилелгениң 80 чылдаанында кырган-авамны сактып бижидим.
Бистиң кырган-ававыс Севилбаа Карамаевна Монгуш 90 хар чедип чорааш чок болган. Ооң көрбээн чүвези-даа, көдүрбээн хөнээ-даа чок: феодалдарның дарлаары, манчы Кыдаттың чиижең садыгжылары дээш бо бүгү кырган-авамның чалыы үезинде болган.
Ол 9 акылыг, боду чаңгыс кыс турган. Мал-маган аразынга эрес-кежээ, шыдамык кылдыр өскен. Ада-чурттуң Улуг дайынының үезинде фашистерни каргап, Кызыл Шеригни йөрээп чораан. Ол 23 бода, 60 ажыг шээр малды болгаш 1960 тыва акшаны фронтуга дузалаан. Бис, уйнуктары, кырган-ававыстың патриотчу чоруун магадаар бис. Кырган-авамны ТАР-ның Биче Хурал Президиуму Хүндүлел бижии-биле шаңнап үнелээн.
Бо чурукта ачам Монгуш Минчирович Ондар-оол, кырган-авам Севилбаа Карамаевна Монгуш база мен Чечекмаа Монгушевна Ондар-оол-дур.
/ Чечекмаа ОНДАР-ООЛ.
Кызыл хоорай.
Чурукту авторнуң архивинден алган.
“Шын” №45 2025 чылдың ноябрь 20