Октябрь 3-те Кызыл хоорайның улуг салгал-биле харылзаа тудар төвүнге Санкт-Петербургка болуп эрткен Россияның пенсионерлериниң VIII спартакиадазының киржикчилерин уткуп алган.
Регионнуң 8 кижилиг командазынче “мөңгүн назынның” эң шыырак спортчуларын республика спартакиадазының түңнелдери-биле шилип алган. Оон-моон келген спортчулар чиик атлетикага, эштиринге, стол теннизинге, дартска, шыдыраага, агаар базыышкыны-биле адар ланчыыга маргылдаалажып, ол ышкаш ГТО-нуң норма-чижээн дужааганнар. Маргылдааларны амы-хуунуң болгаш командалар аайы-биле чоруткан.
Амы-хуунуң маргылдаазынга Виктория Ондар эң эки көргүзүгнү көргүзүп, Россияның эң дээре чээрби шыдыраачызының санынче кирген.
«Спартакиада хөлчок бедик деңнелге эрти. Мындыг чергелиг улуг маргылдааларга чедиишкин дээрге дөгеревиске улуг идиг болуп, дараазында чылга шыырак белеткенирин хүлээндирип турар. Келир чылын хүндүлелдиң чадазынче бедип үнер бис дээрзинге идегээр мен” — деп, Виктория Ондар чугаалап турар.
Киржикчилер парадынга Тываның командазы шииткекчилерни болгаш спартакиаданың киржикчилерин каас-коя национал идик-хеви-биле магададып, «Национал шинчи болгаш бот-тускайлаң хөөн дээш” деп тускай номинацияга дипломну чаалап алган.
Маргылдааларга киржилгеден аңгыда, бистиң спортчуларывыс соңгу найысылалдың төөгүлүг черлеринге экскурсиялап четкен.
А. ХЕРТЕК белеткээн.
«Шын» №76 2023 чылдың октябрь 7