Планның чартыы күүсеттинген

Чиигелделиг ипотека Тывада чуртталга бажыңнарының тудуунга күштүг идигни берген. Ипотека эгелээнинден бээр 500 хире керээлер чардынган. Чүгле Кызылга 2030 чылга чедир хөй аал чурттаар 300 хире чуртталга бажыңнарын тудары планнаттынган.
Чыл ам-даа төнмээн, а чиигелделиг ипотекага бо хүнге чедир 1000 чээлиниң 500 хирезинге керээлер чардынган. Планның чартыын Тыва күүседипкен.
«Ниитизи-биле 3245 чагыг кирген, ооң 1500 ажыын азы 49 хуузун чөпшээрепкен. Амгы үеде 1377 квартираны садып турар. Ук программага хамаатыларны идепкейлиг киржирин кыйгырып тур бис» — деп, Тываның тудуг сайыдының оралакчызы Александр Дугаржап чугаалаан.
Программаны 6 хар четпээн уруглуг азы 18 хар четпээн инвалид уруглуг база ийи болгаш оон хөй ажы-төлдүг өг-бүлелер ажыглап болур. Чиигелделиг чээлини чаа тудугдан чурттаар оран-сава садып алыр азы хууда бажың туттуруп алыр дээш ап болур. Мындыг таварылгада аңаа тускай аккредитация эрткен хүлээникчи тудуг организациязы херек.
«Чиигелделиг ипотеканы ажылдатканы республиканың чурттаар оран-сава айтырыын эки талаже шимчедипкен. Хоорайывыстың шупту районнарында тудуг ажылдары идепкейлиг чоруп турарын чурттакчылар көрүп тур боор. Ооң-биле чергелештир социал объектилер — школалар, уруглар садтары база немежип турар» — деп, А. Дугаржап демдеглээн.
Ийи хуулуг чиигелделиг ипотека бо чылдың декабрьга чедир күштүг. Тус чер чагыргазының планында 2030 чылга чедир чүгле Кызылга 440 муң дөрбелчин метрден хөй чуртталга бажыңнарын тудары көрдүнген. Ол дээрге хөй аал чурттаар 300 хире бажың болур. Бо фондунуң хөй кезии келир чылдың төнчүзүнге чедир дужааттынган турар ужурлуг.

Бистиң корр.
Чурукту интернет четкизинден хоолгалаан: yandex.ru/images/sea...
“Шын” №25 2025 чылдың июль 3