Россияның Социал фондузунуң Тывада эргелели октябрь айның пособиезин эртежик ноябрь 1-ге чедир шилчидер дээрзин дыңнаткан.
Уруглар пособиезин төлээр чаңгыс хүн ай санында 3-түң хүнү. 2025 чылдың ноябрь 3 дыштаныр хүн-биле дүгжүп турар. Ынчангаш уруглар акшазын саадатпазы-биле эртежик шилчидери ол.
17 хар четпээн уругларга болгаш иштиг херээженнерге чаңгыс аай пособие, 1,5 харга чедир уруглар азыраар дээш ажылдавайн олурар ада-иелерге, дун төл дээш 3 харга чедир төлевир, шериг албанныгларның ажы-төлүнге дээш көрдүнген пособиелер ол хүн хамаатыларның агар санынче кирип кээр ужурлуг.
Почта салбырын таварыштыр ап турар хамаатыларга ачы-дуза төлевирин ноябрь 3-тен 25-ке чедир почта салбырының ажылдаар шагы-биле чедирер.
Банк ажылдакчылары төлевирлерни хүнзедир шилчидер. Ынчангаш бир эвес акша-хөреңгиңер эртенги шакта агар саныңарже шилчивээн болза, кежээге чедир манаарын сагындырып тур бис.
Ие капиталының төлевирин ай санында ноябрь 5-те ап турар өг-бүлелер бар. Ноябрь 5 ажыл хүнү болганда, ында өскерлиишкин чок. Ажылдап турар ада-иелерге 1,5 харга чедир уруглар азыраан дээш пособие, 8-тиң хүнү дыштаныр хүн таваржы бергени-биле ноябрь 7-де агар саныңарже кирип кээр.
Айтырыглар бар болза, Россияның Социал фондузунуң чаңгыс аай харылзаа төвүнче 8-800-100-00-01 долгаар. Регионалдыг «изиг шугум» понедельник–четверг хүннеринде 09.00 шактан 18.00 шакка чедир, а пятницада 09.00 шактан 16.00 шакка чедир ажылдаар.
РСФ-тиң Тывада эргелелиниң дыңнадыы-биле.
“Шын” №42 2025 чылдың октябрь 30