Чазак Даргазының оралакчызы Александр Новактың удуртуп эрттирген регионнарны газ-биле хандырарының федералдыг штавының 40 дугаар хуралынга, Чазакта Сибирь федералдыг округтуң куратору Дмитрий Патрушев база Сибирь федералдыг округта Президентиниң бүрүн эргелиг төлээзи Анатолий Серышев киришкен.
Сибирь регионнарын газификастаарының ажылдарынче онза кичээнгей угланган. Чазак округтуң социал-экономиктиг төлевилелдериниң күүселдезинче база үлетпүр хөгжүлдезинче угланган төлевилелдерни күштелдирер сорулгалыг газификация программазын бадылаан. Инфраструктураның амгы кызыгаарлаашкыннарын чайладыр болгаш чурттакчы чоннуң бүзүрелдиг хандырылгазын базачаа инвестиция төлевилелдерин хандырары – кол сорулга деп адаан.
Ужуражылганың киржикчилериниң бодалы-биле алырга, округ федерациязының субъектилеринде газ хандырылгазын экижидеринче угланган мурнады боттандырар төлевилел – Барыын-Сибирь ГТС-тиң тудуу амгы болгаш келир үеде хереглекчилерге газтың немелде хемчээлдерин хандырар газ хандырылгазын көвүдедир ужурлуг.
Анатолий Серышевтиң демдеглээни-биле алырга, Сибирь регионнарын газификастаары – округтуң социал-экономиктиг хөгжүлдезинге, хамаатыларның амыдырал-чуртталгазының шынарын бедидеринге, регионнарда экологтуг байдалды экижидеринге кол барымдаа болур. «Россия Федерациязының Президентизи сөөлгү 10 чылда, Чөөн болгаш Барыын Сибирьни газификастаар талазы-биле чеди даалганы болгаш айтыышкынны үндүрген. Россия Федерациязының калбак хөгжүлдезиниң стратегиязы болгаш Сибирь федералдыг округтуң хөгжүлде стратегиязы чурттакчы чоннуң болгаш үлетпүрнүң газификациязын мурнады боттандырарын үндезинге салган» – деп, Анатолий Серышев демдеглээн.
Амгы үеде газ-транспорт системазының байдалы аңгы-аңгы – газ Сибирьниң барыын талазындан Алтай Республикага болгаш Кемерово облазынга четкен, а чөөн чүкте Тыва Республика биле Хакас Республика, Красноярск край, Иркутск облазының көвей кезии газ-биле хандырылга чок. А бүрүн эргелиг төлээниң чугаазы-биле алырга, Иркутск облазында газ-химия адырын элээн хөгжүдер курлавыр бар. Ынчангаш бо регионнарның газификациязын дүргедедир чогуур хемчеглерни боданып көөрү чугула деп бүрүн эргелиг төлээ чугаалаан.
Алтай крайны, Кемерово, Новосибирск, Томск база Омск областарны, Алтай Республиканы, Иркутск облазында элээн каш чурттакчылыг черлерни, Красноярск крайда Норильск үлетпүр белдирин бойдус газы-биле хандыртынганы демдеглеттинген. Амгы үеде округта шакта 3,4 муң куб бүдүрүлге күчүлүг төлевилелдиг 117 газ-үлелге станциялары ажылдап турар. Газ үлелге четкизиниң узуну – 32 муң километр. Газка хереглелдиң хемчээли – 16,5 млрд куб метр. 782 чурттакчылыг черлер болгаш 784 муң ажыг бажыңнар болгаш өрегелер газ-биле хандыртынган. «Сибирьниң күчүзү – 2» газ шугумун тудуптар болза, Иркутск облазының болгаш Красноярск крайның газка улуг хереглели хандыртына бээр.
2026-2030 чылдарда газ хандырылгазын болгаш газ киирилдезин хөгжүдер программалар-биле 16 хоорайны болгаш 143 чурттакчылыг черлерни газче кожары планнаттынган. Элээн каш чурттакчылыг черлерге СПГ-шиитпирлерин ажыглап, чедери берге черлерни газ-биле хандырар арга тургустунар. Ынчангаш хурал соонда, Сибирь федералдыг округтуң регионнарында газ хандырылгазын экижидер болгаш хөгжүдеринге тус черниң курлавырлар баазазын хаара тудар аргаларын өөренип көөр даалганы Энергетика яамызынга болгаш «Газпромга» берген.