Тываның найысылалының төвүнде илереттинген калчаа аарыының тывылган черин арыглап, ооң нептерээрин болдурбас талазы-биле хемчеглер уламчылап турар. Октябрь 30-де Дом быта чоогунга айыылдыг калчаа аарыглыг ыт илереттингенин сагындыраал. Тыва Республиканың ветеринария албанының эпизоотикага удур отряды база Кызылдың мал эмнээр эргелелиниң специалистери калчаа аарыг ытты тыпкан черже үнген. Бир дугаарында чорудар хемчеглер планын дүрген ажылдап кылган, хоорайга 60 хонуктуң карантинин чарлаан.
Омскунуң эртем-шинчилел институдунуң баазазынга эрттирген лабораторлуг шинчилел аарыгны бадыткаан.
Ветеринария албанының специалистери аарыгның өөскүдүкчүзү тывылган черниң девискээрин хораннап арыглаан. Хоорайда ветеринарлыг-профилактика хемчеглерин ам-даа чорудуп турар. Черлик ыттарны бүдүн хүн дургузунда тудуп ажылдаар. «Городской приют» албан чери ийи бригаданы тургускан, ооң бирээзи хүндүс, өскези дүнеки үеде хаара туттунган. Ветеринар специалистер өрегелерни кезип, азырал дириг амытаннарга тарылганы салырын уламчылавышаан.
Мэрияның дыңнатканы болза, октябрьның 30-ден бээр 1500 азырал амытаннарны тараан. Шупту 2700 хире өрегени кезээн, ээзи чок 240 ытты туткан, 2 га шөлдүг девискээрни дезинфекциялаан. Дириг амытаннарның калчаа аарыынга удур “изиг шугум” телефоннары ажылдап турар: +79016444925, 2-95-11.
Оон аңгыда, көдээ ажыл-агый бүдүрүкчүлеринге кызыгаарлаашкыннарны чарлаан. Республиканың Ветеринария албаны, калчаа аарыынга удур демисежир чурумнуң 6-гы кезээ 34-кү пунктузу езугаар, дириг амытаннар ярмаркаларын база делгелгелерин эрттиреринге карантинниг хемчеглер чоруп турарын тайылбырлаан. «Ветеринарлыг болгаш санитарлыг хайгаарал органнарының чөпшээрээни рыноктарга ветеринар-санитарлыг экспертизаны эрткен болгаш шынзыдып кошкан документилерлиг көдээ ажыл-агый продукциязын садып-саарарында кызыгаарлаашкын чок» — деп, республиканың Көдээ ажыл-агый болгаш аъш-чем яамызы тайылбырлаан.
ТР-ниң Чазааның парлалга албаны.
“Шын” №88 2024 чылдың ноябрь 16