Июнь 6-7 хүннеринде Тыва Республиканың Орус дыл болгаш чогаал башкыларының ассоциациязы ТР-ниң Өөредилге яамызының деткимчези-биле X дугаар делегей чергелиг “Пушкин диктантызы 2023” чырыдыышкын акциязын эрттирер.
Бо чылын ук акцияның кол шөлчүгежи Тыва республиканың лицей-интернады болур. Найысылал Кызылда немелде шөлчүгештерге күрүне лицейи, 15 дугаар лицей, 12 дугаар школа, 5 дугаар гимназия, 11 дугаар школа хамааржыр. Ол ышкаш Бии-Хем кожууннуң 2 дугаар школазынга, Таңдының Сосновка, Чөөн-Хемчик кожуунга Чадаананың 2 дугаар, Чеди-Хөлдүң Хову-Аксының школаларынга база болур. Шагаан-Арыгның 1 дугаар, Ак-Довурактың 1 дугаар школаларының хүндүскү лагерьлериниң баазазынга база эрттирерин планнап турар.
Диктантының онаалгаларын орус дыл болгаш чогаал башкылары мөөрей хевиринге тургускан. Ону күүседиринге чүгле билиглер эвес, угаангыр-сагынгыр, чогаадыкчы болуру чугула. Диктантының үези 45 минута үргүлчүлээр.
Акцияга 1-ден 11 класстың өөреникчилери, ортумак болгаш дээди өөредилге черлериниң студентилери, ном саңнарының ажылдакчылары, башкылар, ада-иелер киржип болур. Онаалгаларны шуптузун назы-хар аайынче болгаш даштыкыдан киржикчилерге орус дылды билириниң аайынче таарыштыр тургускан.
А.С. Пушкинниң төрүттүнген хүнүнге тураскааткан “Пушкин диктантызы” деп акцияны чылдың-на июнь 6-да чурттуң бүгү-ле регионнарынга орус дылды болгаш улуг орус чогаалчының чогаалдарын нептередир сорулгалыг эрттирип турар. Чылдың-на ук акцияга 10 муң ажыг кижи киржип турар. Чылдан чылче ооң киржикчилери көвүдеп чоруп олурар.
#өөредилге_яамызы #орус_дыл #пушкин_диктантызы #Пушкинниң_төрүттүнген_хүнү #тыва_дыл #шын_солун