Путёвка өртээниң чартыын эгидип ап болур

Хоорайдан дашкаар уруглар лагерьлеринче путевкалар садып алган ада-иелер ооң чартыын эгидип ап болурун ТР-ниң Өөредилге яамызы сагындырган.

Компенсация акшазын алырда, дараазында негелделерни албан сагыырын яамы сагындырып турар.

- уруг лагерьге 21 хонуктан эвээш эвес үе дургузунда турар ужурлуг;

- компенсацияны чылда бир катап алыр;

- чүгле хоорайдан дашкаар лагерьлерже путевкалар өртээниң 50 хуузу хире төлевирни эгидер;

- кол негелде – бо чылын саткан путевкага төлевирни бээр;

- компенсацияны алырда, октябрь 1-ге чедир уругнуң киир бижиткен муниципалитеттиң өөредилге эргелелинче билдириишкинни киирер.

ТР-ниң Өөредилге яамызы уругларга чайгы дыштанылганы организастаарының, путевкаларының, компенсация төлевириниң дугайында айтырыгларга харыыларны “изиг шугум” телефону:
8 (39422) 2-72-92 таварыштыр берип турар.

Бо чылын Тывада хоорайдан дашкаар 19 кадыкшылга лагерьлериниң өртээн 17157 рубль кылдыр доктаатканын сагындыраал. Чайгы лагерьлер путевказының ортумак өртээ 6016 рубль болза, майгын лагерьлерже – 4935 рубль.

ТР-ниң Өөредилге яамызының медээзинден.

"Шын" №56 2024 чылдың июль 27