Улуг өгбе Пётр Иванков – халажылгада генерал-майор, Ада-чурттуӊ Улуг дайыныныӊ хоочуну, Тываныӊ улусчу-революстуг шерииниӊ оркестриниӊ хөгжүмчүзү.
Хүндүткелдиг хоочун Петр Фёдоровичиниӊ 97 харлаан хүнүнде, декабрь 1-де, ТР-ниӊ Москва хоорайда бүрүн эргелиг төлээ чериниӊ ажылдакчылары ооӊ амыр-мендизин айтырып, ужуражып четкен. Тыва Республиканыӊ Баштыӊы Владислав Ховалыгныӊ даалгазы-биле байыр чедирбишаан, суй белээн дамчыдып берген.
Петр Иванков — Тываныӊ база бир эки турачызы. Шериг албанынга 12 харлыг оолакты 1942 чылдыӊ апрель 1-де хүлээп алган. Тываныӊ улусчу-революстуг шерииниӊ оркестринге быжыглап каан. Ол труба деп үрер хөгжүм херекселинге ойнап турган.
17 харлыында Тываныӊ кавалерийжи полугунуӊ медээчизи турган. Штабка дежурныйлап турган үезинде, 1945 чылдыӊ май 9-та, Фашистиг Германияны Тиилээниниӊ дугайында медээни Тывага бир дугаар дыӊнап, хүлээп алган.
Пётр Фёдорович Иванков – Россияныӊ Улусчу эртемнер академиязыныӊ база Россияныӊ чурттар аразында туризм академиязыныӊ академиги, экономика эртеминиӊ доктору, техниктиг эртемниӊ доктору, шериг эртеминиӊ кандидады, профессор.
Хоочун эртемден Москва хоорайда Россияныӊ Улусчу эртемнер академиязын 36 чыл дургузунда удуртуп чоруур. Тыва Республиканыӊ Чазааныӊ Тимур Дулуш аттыг үрер хөгжүм оркестри база ук академияныӊ кежигүнү болуп турар.
Төлээлел чериниӊ ажылдакчыларыныӊ байыр чедирип келгенинге улуг өгбе Пётр Фёдрович биле ооӊ өөнүӊ ишти Татьяна Андреевна сеткилинден өөрүп турган. Тывадан келген аалчыларга айтырыгны тывалап салыр болган. Чаш болгаш аныяк үезин Тывага эрттиргенин сактып, тыва дыл кырынга чугаалашканынга дыка өөрээн. Пётр Фёдоровичиниӊ ёзулуг аас-кежиктиг үелери, ооӊ сеткил чүрээн эжелеп алган онзагай чери Тыва дээрзин ооӊ өөнүӊ ишти чугаалаан.
«Ада-чурттуӊ Улуг дайыныныӊ чылдарында эрес-дидими-биле демисежип чораан шериглерниӊ, амыр-тайбыӊ чуртталга дээш бодунуӊ үлүг-хуузун киирип чораан кижилерниӊ төөгүзү кезээде уттундурбас. Бүгү чурт болгаш Тыва дээш кылып чораан буянныг ажыл-херээ дээш өөрүп четтиргенин илередип тур бис. Силерге болгаш силерниӊ эргим чоок улузуӊарга быжыг кадыкшылды, узун назын назылаарын, эгээртинмес күш-шыдалдыг болуруӊарны йөрээп тур бис!» — деп, күзээшкинни чоннуӊ өмүнээзинден илередип турар.
Тываныӊ Москвада төлээлел чериниӊ медээлеринден Р. Демчик очулдурган.
«Шын» №94 2024 чылдың декабрь 7