Хүн келген тудум соок дыңзып эгелээнинден чурттакчы чонга чылыг айтырыы чидиг апаар. Ылаңгыя хөмүр-даш садып алыр куар-кодту (QR-код) каяа, канчаан кылдырар дугайында номчукчуларывыстан айтырыглар редакцияга хөйү-биле кээп турар. Ынчангаш ТР-ниң Одаар чүүл болгаш энергетика яамызының берген медээлеринден QR-кодту канчаар кылдырарын тайылбырлаар-дыр бис.
Республиканың Одалга болгаш энергетика яамызы чурттакчы чонга таарымчалыг кылдыр "Хөмүр-даш продукциязы" күрүнениң информастыг системазын (КИС) тургускан. Ол система таварыштыр хөмүр-даш садып алыр QR-кодту кылдырар.
Канчаар бүрүткедирил база QR-кодту алыры:
Системага бүрүткетпээн кижилер cpgu.rtyva.ru айтыгже киргеш, ону кылдырып ап болур. Айтыгже кире бергеш, тайылбыр езугаар операцияны кылыр. Бир эвес бергедежип турар болзуңарза, Чаңгыс аай тайылбыр албанының 8(39422)5-15-49 дугаарлыг телефонунче долгаар. Системага бүрүткеткеш, хуу кабинединге бажыңын айтып, немээн соонда, бодунуң адрезинче баскаш, QR-кодун алыр. Тодаргай бажыңның шөлүнге санаан херек тонназын айыткан кодту алыр. Бо-ла айтыгда чаарттынган QR-кодту катап база хуу кабинет таварыштыр ап болур.
Системага бүрүткедири база QR-кодту алыры:
Бир эвес системага боттары бүрүткедип азы QR-кодун киирип шыдавас болза, чурттап турар чериниң аайы-биле муниципалитеттиң чагыргазында МФЦ-ден, ол ышкаш Тываның Одалга болгаш энергетика яамызының дараазында телефоннарындан 8(39422)5-16-86, 8(39422)5-15-49 дузаны ап болур.
Бүгү республикада хөмүр-даш садар 39 пункт бар, оларның 13-ү күрүнениң, артканнары хууда сайгарлыкчыларның. «Хөмүр продукциязы» КИС хандырылганың үзүктел чок чедирилгезинге кол рольду ойнап турар. Ол тургустунган чурум езугаар ажылдап, 60 муң хире бажыңны хаара тудуп, херек хөмүр-дашты доктаамал чедирип турар.
Чурттакчы чон хуу хөмүр складтарында одаар чүүлдүң чогун дараазында дугаарларже дыңнадып болур— 8(39422) 5-15-49, 8(39422) 5-16-86, а күрүне складтарында байдалды 8(39422) 2-03-53 дугаар хүлээп ап турар.
А. СОЯН белеткээн.
Чуруктарны ТР-ниң Одалга болгаш энергетика яамызының парлалга албанындан алган.
“Шын” №46 2025 чылдың ноябрь 27