Өөрүп четтирдивис

Чуртталга-коммунал ажыл-агыйының ажылдакчыларының дугайында чурттакчы чоннуң хүн бүрүде амыдыралының судалын тудуп турар кижилер деп чугаалап болур. Оларның ажылы үзүктелир болза, айыыл-халап болур чыгыы. Хоорай, суурлар чырык, чылыг чок артып каап, бок-сакка хөмдүргени ол. Бир эвес Тываны алыр болза, “СТ-ТБО” оператор 2020 чылдың март айда Кызылдың богун аштаарын соксадыптарга, хоорайның хөй каът бажыңнарының чанынга бок овааланып, чурттакчыларның дүвүрелин доюлдурган болгай. Бир эвес тус черниң эрге-чагыргазы хемчеглерни дарый албаан болза, хоорайга “бок үймээни”-даа хайнып үнер часкан.

Кудумчуларда, бажыңнар чанында бокту аштап, үндүр сөөртүп, чылыг, изиг-соок суглар-биле хоорай, суурларны хандырып, оларның девискээрин чаагайжыдып турар буянныг ажыл-иштиг кижилерниң ачызында арыг-силиг байдалда чурттап чоруур бис. Март 19 – оларның профессионал байырлалының хүнү. А байырлалды март 17-де демдеглеп эрттирип, чуртталга-коммунал ажыл-агыйының ажылдакчыларынга байыр чедириишкиннери, өөрүп четтириишкинниң чылыг-чымчак сөстери, шаңнал-мактал-даа арбын болган. Бо бүгү чуртталга-коммунал ажыл-агыйының ажылдакчыларынга өөрүнчүг болбайн канчаар, чүге дээрге олар макталга шоолуг-ла чаңчыкпаан, ажылын кандыг-даа шуугаазын чокка кызымак болгаш ак сеткилдиг кылып чоруур улус-ла болгай.

Тываның Баштыңы Владислав Ховалыгның даалгазы-биле, Чуртталга-коммунал ажыл-агый яамызының ажылдап кылганы “Арыг хоорай. Арыг суур” деп губернатор төлевилелиниң угланыышкыны-биле эрттирген “Муниципалдыг тургузугларның чаагайжыдылгазын, ногаанчыдылгазын болгаш арыг-силиин организастаарынга эң эки ажыл-чорудулгалыг организация” деп республика мөөрейиниң тиилекчилеринге машина-техника аймаан шаңнал кылдыр берген.
“Эң-не эки чаагайжыттынган муниципалдыг тургузуг” номинацияга бирги черни ээлээн Таңды кожуун шаңналга “МТЗ Беларус” тракторну алган. Бо шаңнал дээш аажок өөрээн кижилерниң бирээзи чаа тракторнуң чолаачызы Сылдыс Оюн. Ийиги черге төлептиг болган Бай-Тайга кожуунга “Беларус” маркалыг мини-трактор шаңналды чагыргазының амыдырал-хандырылга талазы-биле оралакчызы Аяс Хертек хүлээп алган. Үшкү черде Ак-Довурак хоорай ассенизатор машина-биле шаңнаткан.

“Эң-не эки чаагайжыттынган чурттакчылыг чер” номинацияга тиилекчи болган Чөөн-Хемчик кожууннуң Элдиг-Хем суур 500000 рубль акшаның сертификады-биле шаңнаткан. Бо номинацияга ийиги черни ээлээн Барыын-Хемчик кожууннуң Эрги-Барлык суур 400000 рубль, үшкү черге төлептиг болган Тожу кожууннуң Ий суур 300000 рубль акшаның сертификаттарын шаңналга алганнар.

“Чаагайжыдылгага чурттакчы чонну идепкейлиг хаара тутканы”, “Чаагайжыдылгага эң тывынгыр чоруу”, “Чаагайжыдылгага идепкейлиг киржилге болгаш чогаадыкчы чоруу” номинацияларга тиилекчи болгаш шаңналдыг черлерни ээлээн кожууннарга болгаш сумуларга янзы-бүрү техника аймаан тывыскан. Шаңналга берген техника аймаа болгаш акша шаңналдары тус черлерниң чаагайжыдылгазын чорударынга ажыглаттынар, ажыктыг болуру чугаажок.

Чонну хоорай, суурларның чаагайжыдылгазынга хаара тударынга “Арыг хоорай. Арыг суур” губернатор төлевилели дыка салдарлыг болганын кожууннарның болгаш сумуларның чагырга ажылдакчылары демдеглеп турарлар.

Чуртталга-коммунал ажыл-агый ажылдакчызының профессионал байырлалының бүдүүзүнде, март 17-де, Тыва үндезин культура төвүнге эрткен байырлыг хуралга Тыва Республиканың Чазааның даргазының оралакчызы Александр Брокерт киржип, республиканың чуртталга-коммунал ажыл-агыйының ажылдакчыларынга байырны Тываның Баштыңы Владислав Ховалыгның өмүнээзинден болгаш бодунуң мурнундан чедирип, хүн бүрүде ажыл-ишке шылгараан, республиканың ажыл-агый адырын сайзырадырынга төлептиг үлүүн киирген ажылдакчыларга шаңнал-макталдарны тывыскан.

Россия Федерациязының Тудуг болгаш чуртталга-коммунал ажыл-агый яамызының Өөрүп четтириишкин бижиктерин Кызыл хоорайның “Чаагайжыдылга” МУБ-туң ажылчыны Мөнгүн-оол Соянга, чолаачылар Вячеслав Носорев биле Анатолий Олбайга, “Уют” башкарыкчы компанияның чолаачызы Андрей Тусьминге, “Төп” башкарыкчы компанияның электромонтеру Мерген Оюнга, “Ангарский” башкарыкчы компанияның дежурный слесарь-сантехниги Үжен-оол Сарык-Дегеге тывыскан.

Тыва Республиканың Баштыңының өөрүп четтириишкин бижиктерин “Чаагайжыдылга” МУБ-туң фельдшери Лариса Ондар, “Ангарский” башкарыкчы компанияның диспетчери Юлия Коломыслова, “Төп” башкарыкчы компанияның слесарь-сантехниги Орлан Саая дээш ажылынга шылгараан өске-даа ажылдакчыларга тывыскан.
“Найысылал” башкарыкчы компанияның аштакчызы Саяна Чүлдүм, “Ангарский” башкарыкчы компанияның каңнакчызы Омак Саая, “Водоканал-сервис” КХН-ниң оператору Евгений Чеботарев дээш элээн хөй ажылдакчылар Тыва Республиканың Дээди Хуралының (парламентизиниң) хүндүлел бижиктеринге төлептиг болганнар.

Кызыл хоорайның мэриязының хүндүлел бижиктери-биле “Ангарский” башкарыкчы компанияның аштакчызы Орлан Моңгул-оол, бо-ла компанияның лифтилер электромеханиги Андрей Станкевич, “Найысылал” башкарыкчы компанияның аштакчызы Александр Эргеп дээш элээн хөй ажылдакчылар шаңнатканнар.
Республиканың чуртталга-коммунал ажыл-агыйы дыка хөй ажылдакчыларлыг болгаш, шаңнаткан база мактаткан кижилер арбын болган.

Байырлыг хурал үезинде ажыл-агый база уттундурбаан. Республиканың коммунал инфратургузуунуң 77 хуузу эргилээнин чуртталга-коммунал ажыл-агый сайыды Мерген Мынын-оол демдеглээш, ону чаартыр талазы-биле регион программазы ажылдап кылдынганын дыңнаткаш, ол программаны 2023–2027 чылдарда боттандырарын чугаалаан.
Чуртталга-коммунал ажылдакчыларының профессионал байырлалы-биле холбаштыр социал четкилерде байыр чедириишкиннери, өөрүп четтирген дугайында бижимелдер база хөй болган. Оларның кол утказы – кызымак ажылы дээш өөрүп четтиргени.

/ Шаңгыр-оол МОҢГУШ белеткээн.