Петербургтуң делегейниң экономиктиг шуулганының үезинде Тываның Баштыңы Владислав Ховалыг Татарстанның Баштыңы Рустам Минниханов-биле Дугуржулгага ат салганын бодунуң блогунга бижээн:
«Татарстанныӊ стендизинге чугаалажышкын чедиишкинниг үре-түӊнелдиг болуп эрткен. Эрткен чылын ноябрь айда кылган Дугуржулгавысты боттандырар планынга Рустам Нургалиевич Минниханов-биле кады ат салдывыс.
Кады демнежип ажылдаар чүүлдеривисти демдеглээш, оларны күүседип боттандырарыныӊ чурумун тодараттывыс. Бараан саарылгазын көвүдедириниӊ, чурагайжыдылганыӊ, национал политиканы боттандырарыныӊ болгаш өске-даа чүүлдерге хамааржыр айтырыгларны кады дугуржуп тургаш, шиитпирлээр бис.
Россияныӊ тудуг болгаш чуртталга-коммунал ажыл-агыйыныӊ сайыды Ирек Энварович Файзуллин-биле ужураштывыс. Кызыл кожууннуӊ Каа-Хем суурун хөгжүдүп сайзырадыры-биле техниктиг (канализация) тудугларыныӊ айтырыын сайгарып чугаалаштывыс».