Өре тыртарын түр соксаткан.

Даштыкы күрүнелерниң болгаш делегей организацияларының кызыгаарлаашкыннар хемчеглерин кииргени-биле холбаштыр Суд приставтарының федералдыг албаны Россия Федерациязының социал-экономиктиг байдалын турумчудары-биле болур-чогууур хемчеглерни ап чорудуп турар.

2022 чылдың март 23-те Россия Федерациязының Президентизиниң ат салганы «Хоочуннар дугайында” федералдыг хоойлуже өскерилгелер киирериниң дугайында” № 69-ФЗ Федералдыг Хоойлуга дүүштүр 2022 чылдың февраль 24-тен тура Украинаның, Донецк Улус Республиканың база Луганск Улус Республиканың девискээрлеринге тускай шериг операциязының үезинде салдынган сорулгаларны күүседири-биле чоруткан хамаатыларны дайынчы хөделиишкиннерниң хоочуннарынга деңнээн.

«Күүселде чорудулгазының дугайында” № 229-ФЗ Федералдыг хоойлунуң 40-ги чүүлүнүң 1-ги кезээниң 3-кү пунктузунга дүүштүр Россия Федерациязының Чепсектиг күштериниң хүрээлеңинде дайынчы хөделиишкиннерде киржип турар өрелиг кижилерге, Россия Федерациязының хоойлужудулгазынга дүүштүр тургустунган өске шериглерге, шериг хевирлээшкиннеринге болгаш органнарга хамаарыштыр, а ол ышкаш шак-ла ындыг дөмей байдалга таварышкан өре тыртыкчыларының дилээн езугаар күүсекчи суд приставының күүселде чорудулгазын бүрүнү-биле азы кезик-чамдыктап ара соксаткан.

"Күүселде чорудулгазын ара соксадыр дизе, чылдагаан-барымдааларны бадыткаан документилерниң бодун азы нотариустуң шынзытканы хоолгаларын күүсекчи суд приставынга көргүзер” - деп, Тыва Республиканың кол суд приставы Омак Достай дыңнаткан.

Тускай шериг операциязының киржикчизиниң өмүнээзинден күүселде чорудулгазы-биле холбашкан бүгү хөделиишкиннерни чорудар эргелиг төлээлер Россияның Суд приставтарының федералдыг албанының албан-дужаалдыг кижилеринге документилерни көргүзер.

Ындыг ара соксадыышкынга барымдаа болур байдалдар аңаа билдине бергенде суд приставы күүселде чорудулгазын бот-тускайлаң ара соксадып болур.