Чөөн-Хемчиктиң кожууннар аразының эмнелге төвүнге Россияның Президентизи Владимир Путинниң шиитпири-биле эгелээни «Узун болгаш идепкейлиг назын» национал төлевилелдиң күүселдези-биле чаа септеттинген хирургия салбырының оран-савазынга реабилитация салбырын байырлыг байдалга ажыткан.
Специалистер чаарттынган оран-савада байырлыг болгаш хөглүг хөөн-биле ажылдап эгелээнин бүгү коллективтиң өмүнээзинден Чөөн-Хемчиктиң кожууннар аразының эмнелге төвүнүң улуг эмчизи Шораана Ховалыг демдеглээн. Бичии суурларга безин кадык камгалалының материал-техниктиг инфраструктуразын дүрген экижидер арганы бергени дээш, федералдыг удуртулгага база Тываның Баштыңы Владислав Ховалыгга, кадык камгалал сайыды Анатолий Югайга төлевилелдерни чедиишкинниг камгалап, оран-саваның таваан салырындан эгелээш, ажыглалче кииреринге чедир ажылдың шынарын амы-хууда хайгааралга алганы дээш өөрүп четтиргенин илереткен.
«Эмнелге чериниң оран-савазы дендии эптиг болгаш чырык апарган, артында-ла элээн делгем ышкаш сагындырар» – деп, «Көдээ черниң эмчизи» программаның киржикчизи, хирург, онколог, УЗИ специализи Милада Ондар чугаалаан. – "Чаарттынган оран-савада дүрген дуза чедирер болгаш план ёзугаар кезиишкин кылыр ийи өрээл көрдүнген. Аңаа амгы үениң лапароскоптуг дериг-херекселин ажыглап тургаш, улгаттыр чара кеспес кезиишкиннерни кылып болур. Палаталарда орун-дөжек чанында аарыг кижилерниң байдалын хайгаараар чаа дериг-херекселдер база бар".
Ында ажылдакчыларга болгаш эмчилерге таарымчалыг байдалдарны база тургузуп турары онзагай. Эмчилер өрээлин, кухняны, чунар өрээлди чаңгыс черде кылган.
Кожуунга реабилитация салбырын ажыткан, чаа дериг-херекселдер немешкен соонда, кезиишкин, нерв, чүрек-дамыр аарыглары болгаш кемдээшкиннер эрткен аарыг кижилерге дүрген сегип үнериниң магадылалы улуг апарган. Реабилитация салбырында ниитизи-биле 46 амгы үениң чаа дериг-херекселдерин салган. Чижээ, олурар аарыг кижиниң узунун болгаш деңзизин электроннуг деңзилер хемчээп, килдептер аргалыг. Ол ышкаш аарыг кижилерге таарымчалыг байдалды тургузары-биле 27 оруннуг хүндүскү стационарны база ажыткан, физиотерапия өрээлиниң дериг-херекселдерин чаарткан.
Чөөн-Хемчик кожуунда бо чылын «Узун болгаш идепкейлиг назын» деп чаа национал төлевилел-биле ам-даа беш фельдшер-акушер пунктулары туттунуп турар.
Чыжыргана СААЯ.
Чурукту Кадык камгалал яамызындан алган.
“Шын” №44 2025 чылдың ноябрь 13