2026 чылдан тура Россияның Социал фондузунуң Тывада салбыры тускай шериг операциязының хоочуннарын Социал фондунуң реабилитация төптеринче баарда, орукка халас чоруур документилер-биле хандырып эгелээр. Эмнээшкин алыр черинге чедип алырынга болгаш дедир ээп чанып келиринге аай-дедир орук хөлезини турбас, халас чоруур кылдыр документилерни кылып эгелээн.
Халас билеттерни транспорттуң бүгү хевирлеринге ажыглап болур: автобус, поезд болгаш самолёт. Социал фондунуң Тывада салбыры эмнээшкин эртер дугайында билдириишкинни хандырбышаан, ол-ла дораан катай-хаара халас билетти кылып бээр. Ооң-биле чергелештир ТШО киржикчизинге билеттерни боду садып алыр арганы база арттырып берген. Бо таварылгада орук өртээн Социал фонд эгидип бээр. Билдириишкинни киирип тургаш, шынап-ла, боду төлеп чораан дугайында документилерин кожуп каар.
2026 чылдың январь 1-ден тура ээп чанып келген тускай шериг операциязының киржикчилериниң өг-бүле кежигүннеринге хамаарыштыр деткимчениң чаа хевирин тургускан. Ол дээрге-ле I бөлүктүң инвалиди азы эмчилерниң тодаратканы-биле албан ажаап-тежээп турар кижи херек апарган тускай шериг операциязының киржикчилерин орукка үдеп, ажаап-карактап чорууру дээш, өг-бүлезиниң бир кежигүнүнге орук өртээ, төпке чурттаары болгаш чемненири халас болур дээни ол.
Социал фондунуң амгы үениң дериг-херекселдери-биле чүмнеттинген 12 реабилитация төвүнүң кайы-бирээзинге эмнээшкинни ап, күш-шыдалын, кадыкшылын экижидип ап болур.
Реабилитация төвүнге эмнээшкин эртер дугайында билдириишкинни регионнуң Социал фондузунуң хамаатылар хүлээр албаннарынга азы Күрүне ачы-дуза порталын дамчыштыр киирип болур. Социал фондунуң ажылдакчылары эмнээшкин алыр күзелдиг хоочуннарның кижи бүрүзүнге эгезинден төнчүзүнге чедир бот-тускайлаң дузаны кадар.
Немелде медээлерни 8 800-100-00-01 дугаарлыг халас «изиг шугумдан» билип ап болур. Азы ажыл хүннеринде 8 (39422) 9-61-41, 9-61-46 дугаарларже долгааш, айтырып болур.
Чурукту интернеттен хоолгалаан.
“Шын” №8 2026 чылдың март 5