Күске какпазы
Бир-ле катап күске ферманың ээзи какпа салып каанын эскерип каан. Ол дугайын күске дагаага, хойга база инекке чугаалаан. «Күске какпазы — сээң берге айтырыың-дыр, биске кандыг-даа хамаарылга чок!» — деп харыылааннар.
Кезек үе эрткенде, күске какпазынче чылан киргеш, фермерниң кадайын ызырыпкан. Кадайын эмнээр дээш, дагаа эъди-биле мүн хайындырган. Оон аарыг кижизин тегерип келген төрелдерин чемгерер дээш, хой өзээннер. Төнчүзүнде мөчээн кадайын ажаарда, инек соккан.
Ол бүгүнү күске ханада үт өттүр көргеш, кымга-даа, чүү-даа хамаарылга чок деп чүүлдү бодап каап турган.
Сургаалдың утказы: Бир эвес силерге бир-ле чүүл дорт хамаарышпас болза, ол силерге дегбес деп бодаваңар.
Эзир биле тоолай
Ыяш будуунга эзир чүнү-даа кылбайн, дыштанып олурган.
Бичии тоолай эзирни көрүп кааш айтырган:
— Силер ышкаш чүнү-даа кылбайн олуруп болур мен бе?
— Ынчанмайн, чүге болбас деп — деп, эзир харыылаан.
Тоолай ыяш адаанга дыштанып олурда, хенертен дилги маңнап келгеш, тоолайны туткаш, чипкен-дир.
Сургаалдың утказы: Чүнү-даа кылбайн олурар дээр болза, эң-не бедик черге олурар ужурлуг силер.
Думчууң сукпа!
Фермага аът аарый берген. Мал эмчизи:
— Даарта эртен туруп келбес болза, удудур сыкыртыр болган-дыр.
Эртенинде аът турбаан. Ооң чанынга хой чыткан:
— Дүрген тур, оон башка өлүр сен!
Аът туруп келген.
Мал эмчизи:
— Кайгамчык чүве-дир аа, байырлаар болза эки-дир! Ол дээш хойдан өзээлиңер!
Сургаалдың утказы: Кажан-даа өске херекче думчууң сукпа (ынчалза-даа күске какпазы дугайында чугааны утпаза эки).
Чурукту ГигаЧатка чуруткан.
“Шын” №14 2026 чылдың апрель 16