Ажы-төлдү ие капиталының акша-хөреңгизи-биле өөредири – Тываның чурттакчы чонунга эң-не чугула деткимчелерниң бирээзи-дир. 2025 чылдың эгезинден бээр бо хүнге чедир регионнуң 250 өг-бүлези ажы-төлүнүң өөредилгезинче күрүне деткимчези ие капиталын угландырган. РФ-тиң социал фондузунуң Тыва Республика талазы-биле эргелели бо чылын ниитизи-биле 12 сая ажыг рубльди аңгы-аңгы өөредилге черлеринче шилчиткен.
Өг-бүледе каш-даа дугаар уругнуң өөредилгезиниң өртээн ие капиталы-биле төлеп болур. Уруг төрүттүнген соонда, дораан-на ие капиталын уруглар садынче азы школа назы четпээннер программаларынга өөредилге өртээ төлээри-биле ажыглап болур.
Уругнуң өөредилгезин ие капиталы-биле төлээрде, өөредилге чери-биле төлевирлиг өөредилге ачы-дузазын чедирер дугайында керээни чарып алыр. Ада-иезиниң сертификатка адын салыры чугула. Ооң соонда Россияның социал фондузунуң Тыва Республикада эргелелинче ие капиталының акша-хөреңгизин үндүрер дугайында билдириишкинни киирер. Ону күрүне ачы-дузазының порталынга азы күрүнениң хөй хүлээлгелиг төвүнге (МФЦ) кылып болур.
Россияның социал фондузунуң Тыва Республика талазы-биле эргелели билдириишкинни 5 ажыл хүнүнүң дургузунда сайгарар. Билдириишкинни бадылаар болза, 5 ажыл хүнүнүң дургузунда өөредилге чериниң счёдунче акша-хөреңги шилчиир.
Акша-хөреңгини шилчидер организация азы хууда сайгарлыкчы Россияда девискээринде болгаш өөредилге ачы-дузазын чедирер лицензиялыг болур ужурлуг дээрзин утпаңар. Өөредилге черинче кирген хүнүнде уруг 25 хар четпээн болуру чугула.
Бистиң корр.
“Шын” №31 2025 чылдың август 14