«Өөредилгениң школа системаларының чаартылгазы» деп федералдыг программа езугаар Тывада база бир школаны чаарткан

Тээли суурнуң школазынга үндезин септелгени «Өөредилгениң школа системаларының чаартылгазы» деп федералдыг программа езугаар чоруткан. Бо хүннерде өөреникчилер чаа, чараш болу берген школазында өөрени берген.

Септелге үезинде одалга системазын бүрүнү-биле чаарткан, чаа соңгаларны салган, дээвиирин бүрүнү-биле септээн болгаш өске-даа чугула ажылдарны чоруткан. Оон аңгыда школа иштинде өрээлдерниң эжиктерин солааш, ханаларны, дээвиирни чырык өңнүг кылдыр будааш, шала шывыын база чаарткан.

А чырык болгаш делгем спорт залы өөреникчилерниң чыглыр ынак чери апарган. Аңаа база улуг септелге ажылдары чоруттунган: шалазы чаарттынган, одалга, суг хандырылгазы болгаш канализация системаларын солаан.

Эрткен ийи чыл дургузунда Тыва Республикага күрүне программаларын боттандырып турар үеде, дөртен хире өөредилге черлериниң үндезин септелгезин чорудар арга тургустунган. Чүгле 2024 чылда безин 6 школаның оран-савазы бүрүнү-биле чаарттынган. Тываның школаларынга шак бо хире хемчээлдиг септелге ажылдары хөй чылдар дургузунда болуп көрбээн дээрзин айтып каары чугула.

Чуруктарны интернет четкизинден хоолгалаан.