Бо неделяда Тываның Баштыңы Владислав Ховалыг федералдыг яамыларның удуртукчулары-биле ужурашкан.
РФ-тиң Тудуг болгаш чуртталга-коммунал ажыл-агый сайыды Ирек Файзуллин-биле ужуражылга үезинде инвестициялыг төлевилелдерниң боттанылгазының болгаш регионнуң «Арыг суг» деп федералдыг программага киржилгезиниң дугайында айтырыгларны чугаалашкан. Ол ышкаш Тывада чоннуң амыдыралының деңнелин, шынарын бедидер угланыышкын – чуртталга бажыңнарының тудуу канчаар чоруп турарының дугайында чугаалаан. Эрткен чылын республикага ажыглалче 100 муң дөрбелчин метр, бо чылдың бирги чартыында – 60 муң ажыг дөрбелчин метр чуртталга шөлү ажыглалче кирген. 2028 чылдың төнчүзүнге чедир республикага ниитизи-биле 400 муң ажыг дөрбелчин метр чуртталга шөлдүг, хөй квартиралыг бажыңнарны тударын планнап турар.
Ол ышкаш Тываның Баштыңы республикага социал-экономиктиг хөгжүлдениң программазы-биле сес чуртталга микрорайоннарын тудары планнаттынганын сагындырган. Амгы үеде ол девискээрлерниң кызыгаарларын шыяр, төлевилелин тургузар ажылдар дооступ турар. Айыттынган төлевилелдерниң аразында Каа-Хем суурга туттунар «Преображенский» деп 41 муң ажыг дөрбелчин метр шөлдүг, инженерлиг объектилерлиг болгаш социалдыг инфраструктуразы бүрүн микрорайон база кирип турар.
Владислав Ховалыг Тываны 2023 – 2025 чылдарда «Арыг суг» болгаш «Деткимче» деп федералдыг программаларже киирериниң дугайында айтырыгга аңгы доктааган. Тываның Баштыңы Ирек Файзуллин-биле ук төлевилелди республикага боттандырар планы-биле үлешкен. «Арыг суг» деп федералдыг программаның ачызында Кызыл хоорайның чаа туттунуп турар «Иркутский» болгаш Каа-Хем суурга туттунары көрдүнген «Преображенский» деп чуртталга микрорайоннарынга амгы үениң негелдезинге дүгжүп турар суг үндүрер станцияларны тудар. Оон аңгыда Ак-Довурак хоорайда суг үндүрер черни чаартыр. «Деткимче» программазының дузазы-биле Кызыл хоорайның канализациязын чаартыр, Каа-Хем суурга канализация коллекторун кылыр.
РФ-тиң Саң-хөө сайыды Антон Силуанов-биле ужурашкаш, Тываның Баштыңы республикага чиигелделиг программа-биле чонга ипотека берип эгелээриниң дугайында саналын киирген. Владислав Ховалыг чиигелделиг ипотеканы регионга чуртталга бажыңнарының тудуун деткиир бир арга кылдыр көрүп турарын тайылбырлаан.
Ш. Ондар.