Тываның Дээди Хуралының депутаттарының сайгарылгазынче 2025 база 2026–2027 чылдарда республика бюджединиң дугайында хоойлу төлевилелин киирген. Тываның Баштыңы Владислав Ховалыг ооң дугайында бодунуң блогунда дыңнаткан.
Документиниң кол тургузукчузу — ТР-ниң Саң-хөө яамызы дараазында үш чылда экономиктиг өзүлдениң баш бурунгаар санаашкыннары-биле бюджеттиң өзек чүүлдерин дыңнаткан. 2025 чылда орулгаларның ниити хемчээли 49,5 млрд рубль чедер. 50,7 млрд рубль түңге чарыгдалдар кезээн планнаан. Бюджеттиң чедишпес түңү 1,29 млрд рубль азы РФ-тиң Бюджет кодекизиниң регионнарга тургускан 15 хуу деңнелинден 1,6 катап эвээш.
2025 чылда республиканың каттышкан бюджединиң үндүрүг база үндүрүгге хамаарышпас орулгалары 18,8 млрд рубль, 2024 чылга бодаарга, 28 хуу өзүлделиг болур. Ооң мурнунда чылдарда ышкаш, акша киирилдезиниң кол дөстери– 50 ажыг хуузу кижилерниң орулгаларындан үндүрүг, 14 хуузу – акцизтер төлелгезинден орулгалар, 9 хуузу – организацияларның орулгазынга үндүрүг, 5 хуузу – ажыктыг казымалдар тывыжындан үндүрүглер ээлээр.
Бюджеттиң чарыгдал кезээнде социал адырже чарыгдалдар — ниити чарыгдалдарның 70 ажыг хуузу болур. Ооң иштинде өөредилгеже 60, социал адырже 26, кадык камгалалынче 9, культураже 7 хире хуузу үнер. Муниципалдыг тургузугларның трансперттеринче 20 ажыг млрд рубль көрдүнген.
А. МОНГУШ.
Чингис СААЯНЫҢ тырттырган чуруктары.
«Шын» №84 2024 чылдың ноябрь 2