Республиканың эмчи колледжин бо чылын 245 ортумак тускай эртемниг специалист доозуп үнер

Кадык камгалалының эге звенозун чаартыр программаның кол сорулгаларының бирээзи, республиканың эмнелгелерин кадрлар-биле хандырары болуп турар. Ынчалдыр Республиканың эмчи колледжин 2023 чылда 245 ортумак тускай эртемниг специалистиң доозуп үнери манаттынып турар. Оларның 124-ү “Эмчи сестразы” мергежилди шилип алгаш, ам доозарлары ол. Артканнары, “Эмнээшкин херээ”, “Акушер херээ” угланыышкыннар талазы-биле мергежилдиг болур.

Доозукчуларның мурнунда ам күрүне шылгалдаларын дужаар харыысалгалыг үе эгелээн. Ону чедиишкинниг дооскан соонда, 9 доозукчу боттарының төрээн суурларында фельдшер-акушер пунктуларынга болгаш амбулаторияларга ажылдаары-биле аъттаныптарлар. Чүге дээрге өөренип кирип турда, оларга тускай сорулгалыг олуттарны аңгылаан турган.

Бо доозукчулар Тываның Кадык камгалал яамызының эмчи кадрлар-биле көдээ суурларны хандырар тускай сорулгалыг программазы-биле өөренгеш, доозуп турар специалистер дээрзин сагындырары чугула. Ынчалдыр Улуг-Хем, Таңды, Сүт-Хөл, Каа-Хем, Өвүр болгаш Чеди-Хөл кожууннарда чаа туттунган ФАП-тар, амбулаторияларга ажылдаар специалистер немежир.
Тускай сорулгалыг программа-биле өөренип кирер күзелдиг улусту шилип турган үеде, оларның өскен-төрээн суурунга олчаан ажылдап артып каар дээн сорулгазынче улуг кичээнгейни салып, шак ындыг сургуулдарны колдадыр шилип турганын сагындырып турар.

#Нацпроект_Здравоохранение #Модернизация_первичного_звена