Тываның Тудуг яамызы май 5, 6 хүннеринде чиигелделиг ипотека талазы-биле шимчевес хөреңги ярмаркаларын эрттирер дугайында дыңнадып тур.
Аңаа күүсекчи эрге-чагырга органнарының, чээли организацияларының база тудуг компанияларының төлээлери киржир.
Ярмарка үезинде бирги ээлчегниң рыногундан чурттаар оран-сава садып алырының талазы-биле база чылда 2 хуу чедир чиигелделиг ипотека программазының иштинде ипотека чээлизин долдурарының дугайында силерни сонуургадып турар шупту айтырыгларга харыыларны ап болур силер.
Тыва Республикада 2 хуу чиигелделиг ипотека программазы 2024 чылдың июнь 30-ге чедир ажылдаар дээрзин сагындырып тур бис. Ооң кол негелделери: чээлиниң хуусаазы — 20 чылдан көвүдевес, чээлиниң хемчээли — 6 сая рубльден көвүдевес, баштайгы дадывыры — 15 хуудан эвээш эвес.
Ук программа-биле ипотека чээлизин күзелдиг, төлеп шыдаар, назы четкен РФ-тиң хамаатызы, чурттаар оран-савазы бар-чок-даа болза, ап болур.
Силерни май 5, 6-да «Сүбедей» спорт комплекизинге манаар бис!
«Шын» №33 2024 чылдың май 4