Эрткен неделяда республикада коронавирус хамчыы нептереп эгелээнин Тываның Росхереглелхайгаарал албаны медеглээн.
Ковидтен аараан 62 кижиниң 15-и бичии уруглар, 47-зи – улуг кижилер, оларның 91,5 хуузу иммуннуг камгалал чок болган. Коронавируска удур вакцинацияның болгаш ревакцинацияның ажыктыының дугайында регионнуң эмчилер каттыжылгазы Тываның чурттакчыларынга база катап сагындырып турар.
Республиканың дүрген эмчи дузазы болгаш катастрофа төвүнүң реаниматолог эмчизи Алексей Лазарев июль 26-дан тура республикада неделя дургузунда коронавирус хамчыы өөскүп эгелээнин дыңнаткан.
«Эпидемияга удур тускай чурумну өскертпээн, чүгле 2022 чылдың декабрь 31-ге чедир соксатканын сактыр бис. Ол чүл? Аарыгның деңнели улгадыр болза, Росхереглелхайгаарал катап база маска кедер чурумну киирер, массалыг хемчеглерни безин хоруп кааптар» – деп, эмчи бижип турар.
Ол ышкаш эрткен чылын июль айның ортан үезинден төнчүзүнге чедир шупту уруглар ойнап-хөглээр өрээлдер, парк, Азия төвүнде хем эриин дуглапкан, хемнер-хөлдерже дыштанырын хораан турганын ол сагындырган.
Алексей Лазаревтиң чугаазы-биле алырга, бо хемчеглер өлүмнүг, айыылдыг хамчык аарыгны нептеретпезинче угланган. Республикага кызыгаарлаашкынны ап кааптарга, кижилер хамчык аарыг дугайында уттупкан, а коронавирус кайнаар-даа чорбаан, вирусологтар болгаш инфекционист эмчилерниң сагындырып турганы ышкаш, кижилер дөмей-ле ооң-биле чурттаар апаар.
«Ам доктаамал вакцинация болгаш ревакцинацияны салдырар апаар бис. Россияга вакцина тыптып кээрин кайы хире манап турган ийик бис. Ам ооң каш янзы хевирлери бар-дыр. Чартык чыл болгаш-ла салдырып алыр херек. Боттарыңарны камнаңар, вакцинация болгаш ревакцинацияны албан салдырыңар» - деп, ол түңнээн.
Амгы үеде Тывада 24 вакцинация кабинеттери республиканың медицина албан черлеринде ажылын уламчылап турарын сагындыраал. Уруглар кожууннарның төп эмнелгелеринде поликлиникаларга, кожууннар аразының медицина төптеринге база Республиканың уруглар эмнелгезиниң поликлиниказынга тарыдып ап болур.
Кызыл хоорайда 4 мобильдиг тарыдылга пунктулары ажылдап турар:
«5 сылдыс» садыг төвүнде;
«Курай, курай» садыг комплекизиниң оран-савазында;
Спутникте МЖК микрорайонунда 3 дугаар бажыңда;
Правобережная кудумчузунда, 48 дугаарлыг бажыңда тарылга кабинединде (эмчи амбулаториязы).
ТМГ Медээлер.