Амгы үеде Россияның Украинада чорудуп турары тускай шериг операциязының киржикчилери дайынчыларга кедергей улуг дузаны Россия Федерациязының регионнарының чурттакчылары көргүзүп турар. Тыва Республиканың чонунуң ТШО-да чаңгыс чер чурттугларынга дузазы база улуг. Ол дуза буянныг чүүл апарган.
Хар-назыны бичии хензигбейлер-даа, школачы оолдар, уруглар-даа тыва дайынчыларның хей-аъдын көдүрүп, өөрүшкүлүг, чараш-чаптанчыг, үш-булуңчук чагаажыгаштарны бижип чорудуп турары — ёзулуг дидим, патриотчу чорук.
Назы-хары дөгүп, улгады берген кижи керээ чарып, дайылдажып шыдавазын билир бис. Ынчангаш мен бодум хуумда дуза болзун дээш, чөпшээрелдиг аңчы боомну ТШО-га өргүп сунган мен. Ол боо улай-улай адар автоматчыткан чепсек чүве. 12 калибрлиг болгаш агаарда ужугуп чоруур “баба-яга” дроннарны дүжүр адарынга аажок эптиг. Чүге дээрге боонуң холазынга 10 ажыг тараа оък кире бээр, ынчангаш дроннарны адарга, тараа октар бөлүү-биле бүлгүртүп чедип, черле часпас, дүжүр адыптар ужурлуг.
Росгвардияның офицери мээң боомну хынап көргеш, аажок эки эдилээн боо-дур деп мактап, улуг өөрүшкү-биле хүлээп алган. Мен боомну суйбап, тыва кадай төрээн дайынчы оолдарывыска камгалалдың бүзүрелдиг чепсээ болзун деп бүдүү иштимде чалбарып турдум ийин.
Каш хонганда Росгвардияның хуралынче мени чалааш, шаңнап-мактап, өөрүп четтиргенин илередип, чылыг-чымчак сөстерни сөглеп турдулар.
32 чыл иштинде эдилээн бүзүрелдиг боом-биле сагыш сеткилим чылыг, ынчаар байырлажып чарылган мен.
ТШО-да киржип турар оолдарывыс каас-чараш төрээн Тывазынче онча-менди чанып кээрин күзеп, йөрээп каайн. Курай! Курай! Өршээ, хайыракан!
Александр ООРЖАК, улус өөредилгезиниң хоочуну.
Авторнуң чуруу.
“Шын” №24 2025 чылдың июнь 26