Бо чылдың сентябрьдан эгелеп Тываның шупту девискээринде идегелдиг болгаш шынарлыг чырык хандырылгазын чаңгыс юридиктиг чер – «Россети Сибирь Тываэнерго» компания харыылаар. Республиканың Баштыңы Владислав Ховалыгның чарлыы-биле кол территориалдыг четки организациязын томуйлааны ол.
2024 чылдың сентябрь 1-де күш кирген «Электроэнергетика» дугайында федералдыг хоойлуда өскерилгелерге дүүштүр «РС Тываэнерго» кол төп болур эрге-байдалды алган. РФ-тиң субъект бүрүзүнге доктаамал чырык хандырылгазы дээш харыысалгалыг чаңгыс аай төптү тургузарын ында көрген. Ол чырык четкилериниң активин мөөңнеп, хереглекчилерниң сонуургалында ону удуртуп-башкарарының шынарын экижидер.
«РС Тываэнерго» ындыг төп апаргаш, чырык энергиязын дамчыдар ачы-дузаны көргүзеринге бүрүн эргени алыр. Тываның четкизинче кирген шупту энергия дээш ооң-биле керээлерни чарар апаар. Республика иштинде чырык энергиязын хуваап, дөзүнде хереглекчилерге ону чедирер.
Оон аңгыда, чырык хандырылгазының октаттынган объектилери, территориалдыг четки организациязында кирбээн, тариф бадылаан ээлерлиг чырык четки ажыл-агыйлары дээш харыысалга «РС Тываэнергога» онаажыр апаар. «РС Тываэнерго» чүгле чамдык таварылгаларда муниципалитеттерниң удуртулгазында энергетика объектилерин оларның өнчүзүнче болгаш удуртуп-башкарылгазынче дамчыдып болур.
Бир эвес регионалдыг штаб даалганы бээр болза, компания кол четки организациязы болганда, бодунуң болгаш өске-даа четкилерде аварияларның уржуун чайладырынга харыысалганы алыр.
«РС Тываэнерго» компания кол четки организациязы эрге-байдал-биле 2029 чылдың декабрь 31-ге чедир ажылдаар. Ол үе дургузунда чырык энергетика рыногунга реформаны чоруткаш, шынарлыг ажылды болгаш ачы-дузаны берип шыдавас компанияларны болгаш четки ажыл-агый объектилериниң ээлерин халаары көрдүнген.
/ А. МОНГУШ.
«Шын» №69 2024 чылдың сентябрь 11