Саазын ажылы эвээжээр
Россияның Президентизи Владимир Путин август айга чедир эмчилерниң, башкыларның болгаш өске-даа күрүне албан черлериниң ажылдакчыларының документилер-биле ажылдаар «чүъгүн» эвээжедир хемчеглерни кылып чорудар дугайында дужаалды берген. 2026 чылдың август 1-ге чедир ук дужаалга хамаарыштыр ажылдың отчёдун киирерин Президент манап турар.
Российжилер июньда үш хонук дыштаныр
Россияның Чазааның ниити байырлалдар хүннерин өскертир дугайында чарлыы-биле алырга, 2026 чылдың июнь 12, 13, 14 хүннеринде ажылдавас. Оон аңгыда российжилер майда үш-үш хонук дыштаныр — май 1-ден 3-ке чедир база май 9-тан 11-ге чедир. Ноябрь 4 биле декабрь 31-ге аңгы дыштаныр хүннерни тургускан.
Байырлалдар хүннериниң дыштаныр хүннер-биле дакпырлашканын барымдаалааш, өскерлиишкиннерни киирген. Ол бүгү Күш-ажыл кодекизиниң негелделеринге дүгжүп турар.
Коңгалар орнунга аялгалар
2025–2026 өөредилге чылы адакталып турар. РФ-тиң Өөредилге яамызының медеглээни-биле алырга, Сөөлгү коңганы Ада-чурттуң Улуг дайыны дугайында ырылар солуп эгелээр. «День победы», «Журавли», «О той весне», «Синий платок» дээш оон-даа өске ырылар даңзыда кирген дээрзин Өөредилге яамызы дыңнаткан.
Россияның Өөредилге яамызының организастааны «Коңгалар орнунга аялгалар» деп Бүгү-российжи төлевилел ёзугаар хемчег болуп эртер.
13 дугаар шалың болгаш пенсия
Россияның хамаатылары Чаа чыл мурнунда 13 дугаар шалыңын, а пенсионерлер 13 дугаар пенсиязын алыр ужурлуг деп саналды «Чөптүг Россия» партияның даргазы Сергей Миронов киирген.
«Ажылдап турар кижи бүрүзүнге 13 дугаар шалыңын ап эгелээр деп чүвеге бүзүрээр мен. Чаа чыл мурнунда ол акша кымга-даа хора чедирбес, а харын-даа өөрүшкүнү бээр. Кижилер ядыы-түреңги болганындан амыдыралын хандырып чадап турар. Оларның өре-ширези бажын ажыг. Чамдык улус Чаа чыл байырлалында чоок кижилеринге белектер бээрин, а өскелери чаагай аъш-чем-биле долдур делгээн бай-байлак столдуг уткуп алырын күзеп турар. Ынчалза-даа акша-төгерииниң чедишпезинден ол күзелдер бүрүнү-биле бүтпес»— деп, С. Миронов чугаалаан.
Оон ыңай 13 дугаар пенсияны база киирери чугула деп депутат санап турар. "Ынчаар киириптер болза, чөптүг болгаш шын болур" — деп, политик демдеглээн.
Ук саналды Күрүне Думазынга сайгарар кылдыр фракция кииргенин ол немээн.
Шаңналдарын ап болур
Ооң мурнунда бо арга чүгле ниитилелдерде турган.
Оригиналдыг контент дээш шаңналдарны алыр арга «ВКонтакте» шупту ажыглакчыларынга ажык апарганын социал четкиниң парлалга албаны дыңнаткан.
ВКонтакте хууда арнынга VK Donation-ту ажыглап болур арганы немей киирген, ынчангаш ажыглакчылар өскелерден ылгалдыг, тускай контентиден акша ажылдап ап болур. Ооң мурнунда ол арга чүгле ниитилелдерге турган дээрзин парлалга албаны дыңнаткан.
«Чаартылга бо чоокку үеде шупту хууда арыннарга чоорту көстүп кээр» деп ВКонтакте демдеглээн.
Ажылдаарынга белен
ТАСС-тың СуперДжоб шинчилелин езугаар алырга, Россияның чурттакчыларының чүгле 20 хуузу неделяда алды хонук ажылдаарынга белен. Ынчалза-даа алды дугаар ажыл хүнүн чартык эвес, а өске хүннер дег бүдүнге төлээри чугула деп олар санап турар.
Харыы бергеннерниң 67 хуузу удур болган. Оларның амыр-дыжы дыштаныр хүннүң шалыңындан үнелиг деп санап турар. Шинчилел ёзугаар алырга, хамаатыларның 13 хуузу кандыг-даа харыы берип шыдаваан.
Улуг назылыг ажылдакчылар шалың дээш дыштаныр үезин өргүп шыдавазы илерээн. 35 харга чедир респондентилерниң 26 хуузу, а 45 хардан өрү назылыгларның аразында 16 хуузу чөпшээрежип турар болган.
А. ОНДАР белеткээн.
ТАСС-тың медээлери болгаш чуруктары.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...