50 хуузун эгидерин саналдаан
Аныяк база студент ада-иелерниң дун төлү төрүттүнерге, чурттаар оран-сава хөлезининиң 50 хуузун эгидип бээрин “Чөптүг Россия” партиязының даргазы Сергей Миронов саналдаан. Студент өг-бүлелерге ниити чуртталга бажыңнары тудар күрүне программазын тургузар саналды база киирген. “Шак ындыг эгелээшкинни чыл бурунгаар сайыттар кабинединче база чоруткан бис” – деп, депутат немээн.
Ук партия ооң мурнунда студент өг-бүлелерниң бирги төлү төрүттүнерге, чаңгыс катап 57 муң рубльди төлээриниң дугайында саналды хоойлу төлевилелинче кииргенин С. Миронов сагындырган. “Амгы үеде инфляция-биле пособиениң түңү 100 муңдан эвээжевес ужурлуг. Чамдык регионнарда ону киирипкен. Ол бүгү чуртка турар ужурлуг”– деп, политик демдеглээн.
Хопчу-кара кылдыр санавас
Физика болгаш биологияның ЧКШ үезинде бөдүүн калькуляторну, чүнү-даа биживээн шугумну сан эртеминге база чогаалга орфографтыг сөстүктү, химияга Д.И. Менделеевтиң, дустар, кислоталар эзилдирииниң, металлдарның электро-химиктиг таблицаларын, географияга картаны ажыглаарын чөпшээреп каанын Россияның өөредилге хайгааралынга тодараткан. Ук албан чериниң методиктиг саналдарының аразында стол кырынга аъш-чем, суг, эмнер туруп болуру база демдеглеттинген.
Блогерлерниң пенсиязы кандыг болурул?
Бир эвес блогерлер 25 чыл дургузунда камгаладылга дадывырларын кылып алыр болза, оларның пенсиязы 43 муң ажыг, а 15 чыл иштинде 30 муң бичии ажыг болурун РФ-тиң саң-хөө университединиң профессору Александр Сафонов дыңнаткан.
Дакпырлап ажылдап турар блогерлерниң пенсиязы кол ажылында күш-ажыл керээзи-биле санаттынар. Олар колдуунда боттарын ажылга тургузуп алган кижилер азы хууда сайгарлыкчы кылдыр бүрүткедип алган ажылдап турарлар. Оларның орулгазы чарлалдардан болгаш саарылгадан хамааржыр. Бодун боду ажылга тургузуп алырга, Социал фондуже албан кирер үндүрүглер негевес, ынчалза-даа келир үеде пенсиязынга салдарлыг болурун А. Сафонов чугаалаан.
Бир эвес камгаладылга стажы болгаш пенсия баллдары чок болза, блогер кижи чүгле социал пенсия алыр. Ооң хемчээли 2026 чылдың апрель 1-ден тура 9,4 муң рубль. Ынчалза-даа камгалал пенсия алырда, Социал фондуже камгаладылга дадывырларын дужаары чугула дээрзин эксперт онзалап демдеглээн.
2026 чылда ол дадывыр эвээш дизе 71,5 муң хире рубль. Бир эвес блогер кижи 25 чыл дургузунда ол түңнү киирип алыр болза, ооң пенсиязы 13,8 муң, а 15 чыл дургузунда 12 муң ажыг рубль болурун А. Сафонов демдеглээн.
Россияга сентябрь 1-ден тура 10 ажыг эмчи мергежилдер немежир
РФ-тиң Кадык камгалал яамызының дужаалының төлевилелинден алгаш көөрге, 2026 чылдың сентябрь 1-ден тура Россияга эмнелге ажылдакчыларының 10 ажыг мергежилдери немежир. Документ ёзугаар кадык узун назылаарының, мага-бот болгаш катап тургустунарының талазы-биле эмчилер, микробиолог эмчи, логопед эмчи, психолог эмчи, нейропсихолог, мага-боттуң кадыкшылын катап тургузар, эргореабилитация талазы-биле база нутрицолог эмчилерни номенклатураже киирер.
Ол ышкаш реабилитация база дүрген дуза чедирерин өөредир талазы-биле база ортумак эртемниг эмнелге ажылдакчыларын немээр.
Ооң-биле чергелештир диабетолог, хоорайның (районнуң) педиатры, фельдшер-нарколог база оон-даа өске эргижирээн мергежилдерни соксадырын баш удур көрүп турар. Амгы үеде ажылдап турар специалистерниң ажылчын олуттары камгалаттынып артар.
Чыжыргана СААЯ белеткээн.
Медээлерни база чуруктарны ТАСС-тан алган.
“Шын” №18 2026 чылдың май 14
"Шын" солуннуң МАХ-каналынга каттыжыңар max.ru/join/egenQ...