ТАСС-тың делгелгези
“ТАСС-тың фотохрониказының 100 чылы” делгелге Москвада Күрүнениң төөгү музейинде ажыттынган. Россияның болгаш хамаарышпас күрүнелер эвилелиниң төөгүзүнүң фото-чуруктары Күрүнениң төөгү музейиниң ийи улуг залында делгеттинген.
Делгелгени белеткээринге дузалашкан организацияларга болгаш идепкейжи фотокорреспондентилерге өөрүп четтиргенин Күрүнениң төөгү музейиниң директору Алексей Левыкин илереткен. “ТАСС-тың фотохрониказының 100 чылы” делгелгеде кирген шупту фото-чуруктар төөгү болгаш ниитилел ужур-дузалыг, оларда Россияга болгаш хамаарышпас күрүнелер эвилелинге 100 чыл дургузунда болган болуушкуннарның херечилери фото-чуруктар ында делгеттингенин ол демдеглээн. Күрүнениң төөгү музейинде ТАСС-тың фоточуруктарының коллекциязы база барын, аңаа фото-чуруктарны чыырынга ТАСС-тың корреспондентилери идепкейлиг киришкенин Алексей Левыкин дыңнаткан.
ТАСС-тың фотоинформация редакциязының удуртукчузу, ТАСС-тың фотохрониказының хоочуну Сергей Шахиджанян “ТАСС-тың фотохрониказының 100 чылы” делгелгени Москвада Күрүнениң төөгү музейинге организастап эрттирерин саналдаан. А ТАСС-тың хоочун фотокорреспондентилериниң бирээзи Валерий Христофоров ажыглап чорааны фотоаппараттарының хууда коллекциязындан фотоаппараттарны делгелгеге көргүзери-биле берген.
“Эрткен 100 чылда болуушкуннарның дугайында ТАСС-тың фотокорреспондентилериниң арттырып каан сая-сая фото-чуруктары төөгүнүң шын херечилери-дир. Ол фото-чуруктарда көргүскен болуушкуннарны боттарыныы-биле тайылбырлаар, харын-даа мырыңай амгы салгалдарга өскертир дамчыдары канчап-даа болдунмас. Төөгүнү өскертир тайылбырлаар, боттарының ажык-дүжүүнге ажыглаарын ТАСС-тың фотокорреспондентилериниң чуруктары болдурбас. Чурук бүрүзүн кайы корреспондент кажан, каяа тырттырганы төөгүнүң шынныг бадыткалы, ону ТАСС-тың фотохрониказы камныы-биле кадагалап, камгалап чоруур” — деп, ТАСС-тың хоочуну, билдингир журналист Кондрашев чугаалаан.
ТАСС-тың шыгжамырында 73 сая хире фото-чуруктар бар. Оларга хүн бүрүде муң-муң чуруктар немежип турар.
“ТАСС-тың фотохрониказының 100 чылы” делгелге 2026 чылдың август 31-ге чедир ажылдаар.
Уругларның эрге-ажыын камгалаарын күштелдирер
Бюрократчы частырыгларның уржуунда өске кижилерниң үндүрүглери, чээлилери болгаш өске-даа өрелери назы четпээн ажы-төлге чүдүрлүп кээр чүүлдерден камгалаарын “Чаңгыс демниг Россия” политиктиг партия күштелдирер дээрзиниң дугайында Россияның Президентизиниң чанында уругларның эрге-ажыын камгалаар бүрүн эргелиг төлээ, Россия Федерациязының Күрүне Думазының соңгулдаларынче “Чаңгыс демниг Россияның” федералдыг даңзызында баштайгы беш кижиниң санынче кирген Мария Львова-Белова дыңнаткан. Уругларның эрге-ажыының камгалалынга чижек кылдыр суд приставтарының федералдыг албанының Мытищинск салбырының ажылдакчылары 10 харлыг Арина Захарова өске кижиниң өрезин төлээр дугайында частырыглыг херекти оттурганын Мария Львова-Белова айыткан. Бо таварылга амгы үеде “Чаңгыс демниг Россия” партиязының шыңгыы контролюнда турар. Частырыглыг суд херээн оттурган приставтар хоойлу ёзугаар кеземчеге онаажыр.
“Күрүнениң информация системаларында назы четпээн ажы-төлге хамаарыштыр частырыглар ол-ла дораан илереттинген болур ужурлуг. Чогуур албан черлериниң ажылдакчыларның частырыглары-биле назы четпээн уругларның адынга өске кижилерниң өрелери көстүп кээрге, оларны күш чок болдурар дээш, ада-ие чыл-чылы-биле сүржүр чүүлдерни чок кылыр, бир эвес ындыг таварылга билдинер болза, күрүне органнарының хөделиишкиннери дүрген, частырыгларны болдурбазының чылдагааннарын илередир ужурлуг. Партия бо талазы-биле шыңгыы ажылдаар. Уругларның эрге-ажыын камгалаары – “Чаңгыс демниг Россия” партиязының кол сорулгаларының бирээзи, күрүне органнарының ажылдакчыларының багай ажылының, күрүнениң информация системаларында частырыгларының уржуу-биле назы четпээн ажы-төл түрегделге таварышпас ужурлуг” — деп, М. Львова-Белова чугаалаан.
Адаларга төлевирлиг шөлээ
Россия Федерациязының Күрүне Думазының соңгулдалары чоокшулаан тудум аңгы-аңгы политиктиг каттыжыышкыннар, партияларның талазындан чурттакчы чонга янзы-бүрү аазаашкыннар көвүдеп турар.
Чаа төрүттүнген чаш уругларның адаларынга беш хонук хуусаалыг төлевирлиг шөлээни бээриниң эргежок чугулазының дугайында “Чөптүг Россия” политиктиг партияның баштыңы Сергей Миронов ТАСС информация агентилелинге дыңнаткан. “Чаа төрүттүнген чаш төлүн, божаан кадайын эмнелгеден үндүрүп алырынга белеткенир үе херек. Бичии уруунга орун, идик-хеп садар дээш ада кижиниң шүүдели хөй. Ынчангаш адаларга беш хонук хуусаалыг төлевирлиг шөлээни бээр херек. Ону хоойлу-дүрүмге быжыглаар дээш ажылдаар бис” — деп, бодунуң идеязының чылдагаанын Миронов тайылбырлаан.
“Чөптүг Россия” политиктиг партияның баштыңы Сергей Мироновтуң соңгулда мурнуу чарыында өске-даа идеялары бар. Оларның бирээзи, хөй ажы-төлдүг (үштен эвээш эвес) өг-бүлениң ийи чиик машиназын хоорайларда машиналарны өртектиг тургузар шөлдерге халас тургузары.
Эмнерге болгаш эмнедиринге чиигелделер
Регионда амыдыраарының эң чавыс хемчээлинден пенсиязының акшазы эвээш пенсионерлерге эмнер болгаш медицина херекселдери садып алырынга чиигелделерни киирерин Россияның либерал-демократтыг партиязының удуртукчузу Леонид Слуцкий саналдаан. Ооң дугайында чагааны РФ-тиң Чазааның даргазының оралакчызы Татьяна Голиковаже чорутканын ол дыңнаткан. “Эмнерни халас алырының ачы-дузазын амгы үеде хамаатыларның тускай категориязы ап турар, эмнерни садып алырынга чиигелделер пенсионерлерниң хөй кезиинде чок” — деп, Л. Слуцкий чугаалаан.
Дужаалдың төлевилели
“Айыыл чок чоруктуң үндезини болгаш Төрээн чурт камгалалы” модульдуг өөредилге системазын “Амыдырал ажыл-чорудулгазының айыыл чок чоруу” болгаш “Шеригниң эге белеткели” деп ийи аңгы курстарга чарар дугайында дужаал төлевилелин ажылдап кылганын Россия Федерациязының Өөредилге яамызының парлалга албаны ТАСС информация агентилелинге дыңнаткан.
“Амыдырал ажыл-чорудулгазының айыыл чок чоруу” курска өөреникчилерни хүн бүрүде ажыглаар дериг-херекселдерни ажыглап билиринге, оруктарга болгаш хөй улус чыылган черлерге боттарын шын алдынарынга, өрттер болгаш коммунал озал-ондак, агаар-бойдустуң айыылдыг байдалдарының үезинде шын хөделиринге өөредир.
“Шеригниң эге белеткели” курска дайынчы албан-хүлээлгени шеригге эрттиреринге, ок-чепсекти ажыглап билиринге өөредир, шериг-патриотчу мөзү-бүдүшке кижизидер.
РФ-тиң Өөредилге яамызының ажылдап кылганы хоойлу төлевилели 2026–2027 өөредилге чылының эгези сентябрь 1-ден күштүг апаары планнаттынган.
Чаңгыс-даа хомудал чок
Россия Федерациязының Күрүне Думазының соңгулдаларынга уткуштур кампанияның баштайгы айында Россияның Төп соңгулда комиссиязынга сайгарып көөрү эргежок чугула чаңгыс-даа хомудал кирбээнин РФ-тиң Төп соңгулда комиссиязының кежигүнү Людмила Маркина ТАСС информация агентилелинге интервью үезинде демдеглээн.
Сөөлгү үеде Россияның Төп соңгулда комиссиязынга кирип турар билдириишкиннерниң утказы колдуунда РФ-тиң соңгулда хоойлу-дүрүм айтырыгларынга хамаарыштыр тайылбыр дугайында, Күрүне Думазының депутадынга кордакчылар-даа, соңгукчулар-даа шыңгыы харыысалгалыг, соңгулдалар дугайында хоойлу-дүрүмнүң негелделеринге дүүштүр соңгулда ажыл-чорудулгазынга киржип турар апарган деп Л. Маркина айыткан.
Соңгулда кампаниязының дараазында чадазында, КүрДуманың депутадынга кандидаттарны болгаш партийжи даңзыларны бүрүткээн, азы бүрүткевээн дугайында шиитпирни хүлээп алыр үеде хомудал билдириишкиннер Россияның Төп соңгулда комиссиязынга кирип болурун, оларны РФ-тиң соңгулда дугайында хоойлузунга дүүштүр билдилиг сайгарып көөр апаарын база Л. Маркина чугаалаан.
/ Ш. ЛОПСАН белеткээн.
ТАСС агентилелдиң чуруктары.
“Шын” №28 2026 чылдың июль 23
"Шын" солуннуң МАХ-каналынга каттыжыңар: max.ru/channel_shyn