Профильдиг ээлчеглер эң-не хереглелдиг
2026 чылда уругларга болгаш ада-иелерге дыштанылга лагерьлериниң темалыг сменалары эң-не хереглелдиг болган. Ол сменалар дыштанылга биле чаңгыс аай угланыышкынны каттыштырып турар — спортту, эртемни, чогаадыкчы чорукту болгаш даштыкы дылдар өөренирин. Ол дугайында РФ-тиң чырыдыышкын сайыды Сергей Кравцов ТАСС-ка дыңнаткан.
Уруг бүрүзү дыштанылгадан хөй ажыктыг чүүлдерни алган турар ужурлуг деп сайыт чугаалаан: «Темалыг сменалар эң-не хөй хереглелдиг болган. Ында дыштанылга биле кичээлдерни чаңгыс угланыышкын-биле каттыштырган. Уруглар чүгле кичээлдеп эвес, а шилип алган темазының аайы-биле даштыкы дылдар өөренир, эртем азы спорт-биле чоок өңнүктежир аргалыг».
Чүгле июнь айда 15 муң ажыг профильдиг сменаларга 1 сая уруглар болгаш элээдилер дыштанган. Ол хемчеглерни «Аныяктар болгаш уруглар» деп национал төлевилелдиң иштинде боттандырып турар.
Артык медээниң херээ чок
Российжилерге бодунуң дугайында артык медээлер чарлавазын РФ-тиң Иштики херектер яамызы сүмелеп турар. Аңаа дараазында медээлер хамааржыр: өөренип турар чери, ажылы база чурттап турар чери. Ол ышкаш өг-бүлезиниң болгаш чоок улузунуң дугайында база тарадып болбас.
Оон аңгыда танывазы кижиден амы-хуу шинчилиг айтырыгларынга харыылавазын, бодунуң профилинче киирерин кызыгаарлаарын ведомство сүмелеп турар.
Социал четкилерде контентизин чүгле эш-өөрү көөрүн чөпшээрээни дээре. Ажык чаттарга, бөлүктерге азы шуулганнарга хуу медээлер болгаш бодунуң көрүжү-биле үлешкен ажыы чок, ол ышкаш күткүүшкүннүг темаларга чаргы-чаалы үндүрбес болза эки. Ындыг медээлер элзедикчилерниң (вербовщик) сонуургалын оттуруп болур.
«Өңнүктер» кылдыр танывас кижилерин киирген ажыы чок, кезээде ылавылап, кым аккаунтунуң ээзи, профилин каяа база кажан бүрүткеп алганыл деп тодарадып алыр херек. Ол ышкаш танывазы учёт бижимелдерлиг база дугаарларлыг сезинчиг дыңнадыгларга харыылавазын, «кара даңзы» хүлээлгезин ажыглаарын ИХЯ сүмелеп турар.
Хереглелдиг профессиялар
Келир үеде хереглелдиг артар профессияларны Россия Федерациязының күш-ажыл болгаш социал камгалал сайыды Антон Котяков адаан. Ол дээрге агроном, мал эмчизи база быштак кылырының талазы-биле аъш-чем үлетпүрүнүң технологу-дур.
Бо үш мергежил күш-ажыл рыногунга 2032 чылга чедир хереглелдиг болуп артар дээрзин «Мергежилиниң тергиини» Бүгү-российжи профессионал арга-мергежилдер мөөрейиниң үезинде сайыт дыңнаткан. Ол ышкаш 42 муң хире бо угланыышкыннарның специалистери адырга ажылдап кээр ужурлуг деп, ол немээн.
Аэропорттарга биометрлиг шенелделер
Аэропортка самолётче олурарда биометриялыг эрттирилгени ажыглаан российжилерниң үези 25-30 хуу кызырылган. Экспериментиниң бирги түңнелдериниң дугайында Биометрлиг технологиялар төвү ТАСС-ка дыңнаткан.
Ол экспериментини июнь 1-де Москва биле Санкт-Петербург аразында «Аэрофлоттуң» рейстеринге шенеп эгелээн. Ону өске угланыышкыннарже — Петербургтан Владивосток, Екатеринбург, Краснодар, Новосибирск, Нижний Новгород, Сочи чедир калбартырын планнап турар деп, вице-премьер Дмитрий Григоренко медеглээн.
/ А. СОЯН белеткээн.
Медээлерни болгаш чуруктарны ТАСС-тан алган.
Шын №30 2026 чылдың август 5
"Шын" солуннуң МАХ-каналынга каттыжыңар: max.ru/channel_shyn