“Россия” делгелгези удавас хагдынар

Бир дугаар канал Улусчу ажыл-агыйларның чедиишкиннериниң делгелгезинде Тыва Республиканың стендизинге четкен.

Тыва Республиканың Бүрүн эргелиг төлээ чери Москва хоорайда болуп турар делгелгеде Тыва Республиканың экспозициязынче Бир дугаар каналдың “Доброе утро” программазының тырттырар бөлүүн чалаан. Тываның стендизинге тырттырар бөлүктү ТР-ниң Чазааның Даргазының оралакчызы, Москва хоорайда ТР-ниң бүрүн эргелиг төлээзи Чечен Чоксум уткуп алган.

Москва хоорайда ТР-ниң Бүрүн эргелиг төлээ чериниң парлалга албанының ажылдакчызы Валерия Аракчаа Бир дугаар каналга интервьюну берген. Ам болур мастер-класстар болгаш улаштыр делгелгениң салым-чолунуң дугайында ол чугаалаан.

Репортаж июль 2-ниң хүнүнде Бир дугаар каналга “Доброе утро” эфиринге үнген.
Делегей чергелиг “Россия” делгелге-шуулган июль 8-те төнер. ТР-ниң стендизин көрүп, мастер-класстарга киржип четтигеринче кыйгырган.

Чыжыргана СААЯ белеткээн.
Чуруктарны интернеттен алган.

“Шын” №49 2024 чылдың июль 3