Чаа өөредилге чылында Тываның көдээ ажыл- агый техникумунуң сургуулдары Россия Федерациязының Чазааның стипендиаттары болур. Оларның өөредилгеге болгаш эртем-шинчилел ажылдарынга чедиишкиннерин бедик үнелээн.
Россия Федерациязының Чазааның стипендиязын дээди болгаш ортумак өөредилге черлериниң тергиин өөредилгелиг, чурттуң экономиктиг хөгжүлдезинге технологтуг база модернизастыг угланыышкынныг чогаадыкчы, эртем-шинчилел ажыл-чорудулгазында чедиишкинниг студентилерге тыпсыр.
Стипендияны бир чылга доктаадыр. Ону 2024 чылдың сентябрь 1-ден алыр.
РФ-тиң Чырыдыышкын яамызының доктаалы езугаар бо чылын Тываның көдээ ажыл-агый техникумунуң 2 сургуулу Россия Федерациязының Чазааның стипендиаттарының санынче кирген. Ол дээрге 2-ги курсчу Каң-Болат Иргит биле 3-кү курсчу Кирилл Сергеенко-дур.
Стипендиаттарга бедик чедиишкини-биле байырны чедирип, моон-даа соңгаар өөредилгеге, спортка, эртем-төлевилел ажыл-чорудулгазынга чаа-чаа тиилелгелерни күзээлиңер!
ТР-ниң Өөредилге яамызының медээлеринден.
Чуруктарны интернеттен алган.
«Шын» №40 2024 чылдың июнь 1