Ийи хүн ажылдаар
2025 чылдың сөөлгү неделязында чүгле бир, ийи дугаар хүнде ажылдаар бис. Ынчангаш бо чылын декабрь айның сөөлгү неделязы чүгле ийи ажылчын хүннүг.
Россияның Чазааның Даргазы Михаил Мишустин 2026 чылда байырлалдар болгаш дыштаныр хүннер дугайында чарлыкка атты салган. Чаа үнүп келир чылда январь 3 болгаш 4-те дыштаныр хүннер таваржы берген. Черле байырлал хүнү болганы-биле чылдырар деп шиитпирлээн.
2026 чылда байырлалдар болгаш дыштаныр хүннер
2025 чылдың декабрь 31-ден 2026 чылдың январь 11-ге чедир, ниитизи-биле 12 хонук дыштанылга хүнү болур. 2026 чылдың февраль 21-ден 23-ке чедир үш хонук дургузунда дыштаныр. Март 7-ден 9-ка чедир үш хүн байырлаар. Май 1-ден 3-ке чедир, 9-тан 11-ге чедир, үш-үш хүн амыр-дыш хүннери болур. Июнь 12-ден 14-ке чедир үш хүн дургузунда дыштаныр. Ноябрь 4 биле декабрь 31-де чаңгыс-чаңгыс хүн – дыштаныр байырлал хүннери.
Узун шөлээже үнер хуусаа
Россияның Хөй-ниити палатазынга иштиг-сааттыг херээженнерниң узун шөлээже үнер хуусаазын өскертир дугайында айтырыгны көдүрген. Иштиг херээжен кижини ооң мурнунда дег 30 дугаар неделязынга чедир ажылдатпайн, а эртежик, баштайгы үш айында-ла, узун шөлээже үндүрер дугайында айтырыгны Россияның Хөй-ниити палатазының демография, өг-бүле, уруглар болгаш өг-бүлениң үнелиг чүүлдериниң талазы-биле комиссиязының даргазының оралакчызы, Россияның Чазааның чанында социал адырда харагалзал талазы-биле чөвүлелдиң кежигүнү Наталья Москвитина чугаалаан.
Аваларга тускай шалың
Россияда ада-иелерге тускай шалыңны доктаадыр дугайында айтырыгны «Справедливая Россия» партиязының лидери Сергей Миронов көдүрген.
Бир эвес шак ол саналды хүлээп алыр чүве болза, тускай көрдүнген «Ада-иелерге шалың» деп акшаны ажылдавайн, ажы-төлүн азырап, кижизидип чоруур авалар алыр. Ол шалыңны уруг бүрүзүнге төлээр ужурлуг.
Туттурган дайынчы
Тускай шериг операциязынга киржип турган украин омак-сөөктүг туттурган дайынчы Дмитрий Агрыков российжи шериглерге өөрүп четтиргенин илереткен. Ол 2025 чылдың август айда мөөңнээшкин-биле Украинаның чепсектиг күштериниң 66 дугаар аңгы механизастаан бригадазының дайынчызы болу берген. Россияның шериглериниң кижизиг чоруун ол демдеглээн. Ооң чугаалааны-биле алырга, Россияның шериглери ону эттеп-соп дорамчылаваан, а харын-даа аъшкарып-чемгерип каан.
Думаа-ханаа кедерээн
Новосибирск облазында грипп хөлүн эрттир нептерээш, эрткен неделя дургузунда эмнелгеге келген улустуң саны 10-15 хуу чедир өзе берген. Ол дугайында тус черниң кадык камгалал сайыды Ростислав Заблоцкий дыңнаткан.
Омск хоорайда ОРВИ-ден 23 школаның 140 клазында болгаш 41 уруглар садының 64 бөлүүнде карантинни ноябрь 25-те чарлаан. А Кузбасстың ийи школазы декабрь 1-ден эгелээш, онлайн өөренир хевирже шилчээн.
300 эликти камгалаан
Новосибирск облазында өремелендир доңган хөлче дүшкен 300 эликти Бойдус курлавырының болгаш Онза байдалдар яамызының ажылдакчылары камгалап алган. Дириг амытаннар көжүп чорааш, доңган хөлче дүже бергеш, боттары үнүп шыдаваан. Оларны камгалаар дээш, самолётту ажыглаан. Тус черниң чурттакчылары болгаш аңчылар база камгалал ажылдарынга киришкен.
28 медальды чаалап алган
Россияның Чепсектиг Күштериниң командазы регионалдыг Делегей чергелиг шериг спортчу чөвүлелиниң иштики альпинизм чемпионадынга тиилээш, 28 медальды чаалап алган.
Регионалдыг болгаш делегей чергелиг маргылдаалар альпинизм төвүнге ноябрь 30-де болган. Спортчу хемчеглер ноябрь 26-дан 30-ге чедир Москвага болуп эрткен. Мөөрейге 14 чурттан 100 ажыг спортчулар чыглып келген. Россияның Чепсектиг Күштериниң командазы 28 медальды чаалап алган.
Айдың ОНДАР белеткээн.
Чуруктарны интернеттен хоолгалаан.
“Шын” №47 2025 чылдың декабрь 4