2022 чылдың 6 айының дургузунда национал төлевилелдерни боттандырарынга көрдүнген акша-хөреңгиниң 49 хуузун Тыва шиңгээдип алган. Ол дээрге бүгү чуртта болгаш Сибирь федералдыг округта эки көргүзүг-дүр. Тываның Чазаанга Аппарат хуралынга национал төлевилелдерниң боттанылгазынга хамаарышкан чамдык түңнелдерни үндүрген.
Тыва 2022 чылда ниитизи-биле 7,7 млрд акшаландырыышкынныг 11 национал төлевилелде киржип турар. Регионалдыг казначейство чериниң июль 8-тиң көргүзүглери-биле, национал төлевилелдерни боттандырарынга көрдүнген акша-хөреңгиниң 49 хуузун азы 3,8 млрд рубльди Тыва шиңгээдип алган (РФ – 33,4 хуу, СФО – 29 хуу).
Көрдүнген акша-хөреңгини шиңгээдип алыры-биле «Биче болгаш ортумак сайгарлыкчы чорук болгаш хуу ажыл-агыйны деткиир эгелекчи саналдар» деп төлевилел тергиидеп, 217,8 млн рубльди (98 хуу) ажыглап, шиңгээдип алган. Оон ыңай ол талазы-биле бедик түңнелдерни «Экология» (69 хуу), «Культура» (63 хуу), «Демография» (62 хуу), «Өөредилге» (47 хуу) деп национал төлевилелдер көргүскен.
Россияның ортумак деңнели-биле «Чурттаар оран-сава болгаш хоорай хүрээлеңи» (38 хуу ), «Айыыл чок шынарлыг оруктар» (34 хуу), «Кадык камгалалы» (26 хуу) деп төлевилелдер чоруп олурар.
Көрдүнген акша-хөреңгини шиңгээдип алырынга озалдап турар төлевилелдер: «Сан-чурагайлыг экономика», «Күш-ажылдың бүдүрүкчүлүү» болгаш «Чурттар аразынга кооперация болгаш экспорт». Республиканың Баштыңы озалдап ажылдап турар национал төлевилелдерни боттандырарып турар яамылар болгаш албан черлериниң удуртукчуларындан шалыпкын ажылдаарын негээн.
Бистиң корр.