Чаа өөредилге системазы
Россияның студентилери 6 чыл өөренир дугайында медээни РФ-тиң Өөредилге болгаш эртем яамызы чарлаан.
Чаа өөредилге системазынче шилчилге 2026-2027 өөредилге чылында эгелээр: туризм адырында өөренип турар студентилер – 4 чыл; башкы, эмчи, инженер мергежилин шилип алган студентилер – 5 чыл; элээн нарын эртемнер өөредир угланыышкынныг өөредилге албан черлерин шилип алган улус 6 чыл өөренир.
Чолаачыларның кичээнгейинге
Россияның девискээринге мунуп чорууру автомашиназының күрүне дугаары тода көзүлбес – чижээ, хар азы малгаш дуглап турар болза, өжегерээн саазын-биле чажырып алган таварылгада, бир эвес ооң мурнунда 5 муң рубльга торгаалды бижип турган болза, ам чолаачының шынзылгазын машиназының дугаары тода көзүлбээни дээш 1 чыл чартык хуусаада хавырып апаар.
Интернет чокта
Эрткен неделяда Кострома, Ярославль, Ивановск, Владимир болгаш Мурманск областарынга бүдүн хүн дургузунда интернет ажылдавайн барган. Интернет четкизи-биле ажыл-агый чогудуп чаңчыккан хамаатыларга чаңгыс хүнде интернет чокта ажылга улуг саадаашкынны, чамдык чугула төлевирлер чорударынга нарын байдалдар тургустунганы билдингир.
Интернет хереглекчилери Ростелекомче хөй хомудалдарны киирген соонда, магистраль шугумунда техниктиг чылдагааннар-биле үрелиишкиннер интернетке үзүктелиишкинни тургускан деп, тайылбырны берген.
Хенертен улуг хар дүшкен
Эрткен неделяда Москва, Подмосковье, Санкт-Петербург, Мурманск облазынга хары угда улуг хар дүшкен соонда, ол хоорайларның пассажир аргыжылгазынга нарын байдалдарны тургускан. Чамдык аэропорттарга авиарейстер график ёзугаар көрдүнген үезинден озалдап үнер ужурга таварышканы пассажирлерге эпчок болган-даа болза, онза айыылды болдурбаан.
Москвада коргунчуг хап тывылган
Ноябрь 16-да Москваның Гольяновск кылымал хөөлбектен чаш төлдүң мөчүзүнүң артынчыларын суп каан хап тывылган. Ол коргунчуг болуушкунну истеп тывары-биле хоорайның прокуратуразы күжениишкинниг ажылдап турар.
Истелгениң баш бурунгаар илереткени-биле, хап иштинге 7-10 хар үезинде чаштың мөчүзүнүң артынчыларын 180 см ортумак дурт-сынныг эр кижи октапкан болуп турар. Шагдаа ажылдакчыларының баш бурунгаар чоруткан оперативтиг хемчеглериниң түңнелинде, 6 харлыг оолдуң амы-тынынга соңгу адазы биле наркоман авазы четкени билдинип турар.
Истелге ам-даа уламчылап турар. Каразыттырып турарларның наркотиктиг бүдүмелдер ажыглаан соонда, ам-даа угааны орталанмаанындан, тайылбыр алыры болдунмайн турар дээрзин “Прямой эфир” ТГ каналда бижээн.
Черден акша көдүрбеңер!
Россияның аңгы-аңгы хоорайларында черге чыткан акша көдүргеш, холу, буду чок арткан улус саны көвүдеп турар. Ылаңгыя хөй түңнүг акша адаанда күштүг частыр чүүл барын утпас болза эки. Ада-иелер уруг-дарыынга ол дугайында тайылбырлаар болза эки. Серемчиде хорамча чок.
Сорунза МОНГУШ белеткээн.
Чуруктарны интернеттен хоолгалаан.
“Шын” №45 2025 чылдың ноябрь 20