Россияның барааннарын Шэньянга болур “Россияга бүдүрген” деп фестиваль-делгелгеге чедирип таныштырар

Россияның Көдээ ажыл-агый яамызының деткимчези-биле Россияның даштыкыже үндүрер (экспорт) төвү база катап Кыдаттың Ляонин можузунуң найысылалы Шэньян хоорайга “Россияга бүдүрген” деп фестиваль-делгелгени эрттирер. Фестиваль 2025 чылдың январь 17—25 хүннеринде, кыдат Чаа чылдың бүдүүзүнде хоорайның төвүнде билдингир “Орус кудумчузунда” турар Shengjing Mall деп эң-не улуг садыг-саарылга төвүнге болуп эртер.

Шэньянның чурттакчылары Россияның 40 регионундан шилиттинген 120 ажыг бүдүрүкчүлерниң бүдүргени аъш-чем, суксун аймаа, косметика, сувенирлер болгаш ус-шеверлерниң барааннарын үнелеп, таныжып көөрлер. Аалчылар тускай залдарга белеткей салган аъш-чемнерниң амданын амзап, шынарын хынап көргеш, боттарынга таарышкан аъш-чемни дорт-ла бүдүрүкчүлерден садып ап болур. Россияның аъш-чем барааннарын Кыдаттың маркетплейс четкизинде РЭТ-тиң национал садыгларындан база садып ап болуру көрдүнген.

— Кыдат күрүне Россияның Агро-үлетпүр комплекизиниң (АПК) салбырында стратегтиг партнеру. Ийи таланың садыг-бүдүрүлгелери сөөлгү чылдарда шалыпкын сайзырап, улуг күш-шыдалды тургузуп турар. База бир кедилиг угланыышкыннарның бирээзинге бедик өртек сиңирген российжи барааннарны улгаттырары болур. Бо угланыышкын-биле тускай сорулгалыг ажылдап турар бис. Ооң бир чижээнге “Россияга бүдүрген” фестиваль ышкаш хемчеглерни эрттиреривиске бистиң бүдүрүкчүлеривис боттарының кылган янзы-бүрү барааннарын хөйү-биле чедирип, киржип турар. Оларга шокалад, мороженое, кургаг чемнер, сүт-биле кылган, балык болгаш эът аймаандан кылган аъш-чемнер, янзы-бүрү суксун аймаан хамаарыштырып болур. Бистиң чуртувустан эккелген барааннар КУР-нуң хереглекчилеринге шагда-ла билдингир, чоок таныш болгаш оларның хергелели аажок улуг апарган. Кыдаттың рыноктуг саарылга салбырынга эки шынарлыг российжи аъш-чемнер барааннарның хереглели улам улгадырынга, бот-боттарынга ажыктыг ийи таланың садыг-саарылга талазы-биле кады ажылдажылгазы моон-даа соңгаар улам экижииринге бүзүреливис улуг – деп, Россияның көдээ ажыл-агый сайыды Оксана Лут демдеглээн.

Делгелге шөлчүгештеринге компаниялар кыдат бизнестиң төлээлери-биле ажыл-агыйжы ужуражылгаларны эрттирип, чаа-чаа төлевилелдерни, кады ажылдажылгаларның дугайында сайгаржып чугаалажыр.

— “Россияга бүдүрген” фестиваль-делгелге хереглекчилер аразынга, бизнес каттыжыышкыннар аразынга дорт харылзааларны тургузуп, немелде бизнес талазы-биле аргаларны быжыглаарынга чугула болур. Баштайгы делгелге 2024 чылдың январь айда Ляонин можузунга болуп эртип турда, российжи барааннарга, бистиң культуравыска аажок улуг сонуургалдыын көрген бис. Бо чылын фестиваль-делгелге сезону Кыдаттың Шэньянга ажыттынар – деп, Россияның экспорт төвүнүң чиңгине директору Вероника Никишина демдеглээн.

Чаа фестивальдиң темазынга сураглыг “Щелкунчик”. Ол көрүкчүлерге орус балеттиң болгаш Чаа чылдың тоолунуң сеткил-хөөнүн оттурар. РЭТ чараш культурлуг программаларны белеткээри чаңчыл апарган. Шэньян хоорайның чурттакчыларын уран чурулгаларның, ойнаарактарның мастер-класстары, чогаадыкчы коллективтерниң оюн-тоглаалары, кыдат дылда анимациялыг фильмнерниң көрүлделери, амгы медиа-чурукчуларның делгелгелери болгаш российжи барааннарның дугайында лекциялары манап турар.

Россияның экспорттуң төвү “Россияга бүдүрген” фестиваль-делгелгени Кыдатка үш дугаар эрттирип турарын сагындырып каалыңар. Кыдат Чаа чылдың бүдүүзүнде баштайгы делгелге Шэньян хоорайга болгаш Ляонин можунуң улуг хоорайларынга болуп эрткен. Ийиги хемчег май айда Харбин хоорайга, Хэйлунцзян можузунга, үшкү делгелге ноябрь айда Сычуань можунуң найысылалы – Чэнду хоорайга тус-тузунда болуп эрткен. “Россияга бүдүрген” программаның болгаш фестиваль-делгеле дугайында РЭТ-тиң сайтызындан таныжып, билип ап болур силер.

Медээлер болгаш фото-чуруктарны “Россияның экспорт төвү” АН-ниң сайтызындан алган.