Пенсияның ортумак хемчээли 30 ажыг муң рубль
ТАСС-тың дыңнатканы-биле Чукотка, Карелия, Якутия, Коми Республикалар, Камчатка край, Ненец, Ханты-Мансий, Ямал-Ненец автономнуг округтар база Магадан, Мурманск, Сахалин, Архангельск областар дээш Россияның 12 регионунда пенсияның ортумак хемчээли 30 муң рубль ажа берген.
Ажы-төлдүг өг-бүлелер бирги черде…
Хөй-ниити палатазының демография талазы-биле комиссиязының даргазы Сергей Рыбальченко аэропорттарга коляскаларны ажыглаар ужурлуг дээрзин демдеглээн.
Ажы-төлдүг өг-бүлелерни коляскалар-биле хандырар база оларга самолёттардан мурнай үнер оруктарны аэропорттар хандырар ужурлуг деп, Россия Федерациязының демография, өг-бүле, уруглар болгаш өг-бүлениң чаңчылчаан үнелиг чүүлдериниң талазы-биле комиссияның хамааты палатазының даргазы Сергей Рыбальченко ТАСС-ка дыңнаткан.
"Мен бодаарымга, чүък сөөртүр тележкалардан аңгыда, аэропорттар ажы-төлдүг өг-бүлелерниң чоруурунга эптиг болзун дээш, коляскаларны база киирер ужурлуг" — деп, ол чугаалаан.
Уругларлыг пассажирлер самолётка олурупкаш, коляскаларын хыналдаже дужаапкаш, самолёттан дүжүп тургаш, колясказын эгидип бээрин манаар ужурга таварышкаш, эң-не сөөлүнге артарын С. Рыбальченко демдеглээн.
"Мээң бодалым-биле алырга, оларга самолёттан дүжеринге эптиг байдалдарны өөренип көөр болза эки. Ажы-төлдүг өг-бүлелерни үнер эжик чоогунга олуртуп болур, а авиакомпанияларга уругларның бар-чогун болгаш колясканың хереглелин баш бурунгаар дыңнадып болур. Ынчангаш ону кадыының байдалы кызыгаарлыг пассажирлерге дег самолетче дорт чедирип болур" – деп, Хөй-ниити палатазының комиссиязының удуртукчузу санал киирген.
Оон аңгыда аэропорттарга болгаш самолёттарга ажы-төлдүг пассажирлерни эрттириптер дугайында кыйгырыглар турар ужурлуг дээрзин хөй-ниитижи немээн.
Үш кыска ажылчын неделя манап турар
2026 чылда июнь, ноябрь, декабрь айларда байырлалдар дээш российжилер дыштаныр.
Ажылчын хүннери кыска неделя июнь 8-тен 11-ге чедир. 12-де, пятницада, Россия хүнүн демдеглээр. Ынчап кээрге, российжилер улаштыр үш хүн дыштаныр.
Дараазында ноябрь 4-те российжилер Чоннуң чаңгыс деминиң хүнүн байырлаар. Ынчангаш ол неделяда чүгле 4 хүн ажылдаар. 2, 3 болгаш 5, 6 хүннеринде ажылдаар.
2026 чылдың эң-не сөөлгү неделязының чүгле үжүнде ажылдаар бис. Декабрь 31 – байырлал хүнү. Декабрь 31-ден эгелээш дыштаныр хүннер эгелей бээр.
10 дээди өөредилге черлери
РФ-тиң Өөредилге болгаш эртем яамызы 2026–27 өөредилге чылында күрүне акшаландырыышкыны-биле хандыртынган эң-не эки 10 дээди өөредилге черлерин дыңнаткан.
Даңзыже дараазында өөредилге черлери кирген: Уралдың Б.Н. Ельцин аттыг федералдыг университеди, Москваның М. Ломоносов аттыг күрүне университеди база Казаньның федералдыг университеди. Эң-не хөй бюджет олуттар бо чылын үстүнде ады кирген үш өөредилге черлеринде бар.
Оон ыңай бюджет олуттар дараазында өөредилге черлеринде база бар: Санкт-Петербургтуң Пётр Великий аттыг политехниктиг университеди, Экономиканың дээди школазы, Чөөн чүктүң федералдыг университеди, Сибирьниң федералдыг университеди, Донда Ростов күрүнениң техниктиг университеди, Москваның Бауман аттыг күрүнениң техниктиг университеди, Санкт-Петербургтуң күрүне университеди.
Ажылдап турар российжилерниң ортумак пенсиязы элээн өскен
Пенсионерлер апрель айда ортумаа-биле 23600 рубльди алган, бир чыл бурунгаар 21000 рубль турган дээрзин Социал фондунуң медээлери көргүзүп турар. Ажылдап турар хамаатыларның ортумак пенсиязы чыл дургузунда 2600 рубль чедир өскен.
Шалың өскен дээрзин М. Решетников сагындырган
Экономиктиг хөгжүлде сайыдының дыңнатканы-биле алырга, бирги кварталда шын орулганың өзүлдези 2,6 хуу болган.
Экономиктиг динамика багай-даа болза, орулганың өзери уламчылап, шалыңнар өзүп турар деп, РФ-тиң экономиктиг хөгжүлде сайыды Максим Решетников РФ-тиң Президентизи Владимир Путин-биле ажыл-агыйжы ужуражылга үезинде чугаалаан.
Клубника өртээ бада берген
Россияның улуг садыглар четкилеринде честек-каттың (клубника) өртээ бир ай дургузунда үштүң бир кезии хире бада берген. Бир килде 800 рубльден өрү деп, садыг компанияларының ассоциациязының даргазы Станислав Богданов демдеглээн.
Хуу детективтерни хайгаараар дүрүмнерни бадылаан
Документ сентябрь 1-ден эгелеп күш кирер.
Хамаатыларның хөй санныг хомудалдарынга үндезилээш, хуу детективтерниң ажыл-чорудулгазын хайгаараар дүрүмнерни бадылаан. Ол документ 2026 чылдың сентябрь 1-ден хууда камгалал болгаш детективтиг ажыл-чорудулга дугайында хоойлунуң чаа хевири-биле кады күш кирер. Ол бүгүнү чурумчудар орган Росгвардия болур.
План ёзугаар хыналдалар үш чылда чаңгыс катап болур. Ол дээрге хууда детективтиң клиент бүрүзү-биле чарып турган керээлерин, оларның ажыл-чорудулгазының дугайында отчёттар болгаш хууда детективтиң дугайында медээлер, кем-херек үүлгедиишкини кылган азы кылбаан бе, эмчи шинчилгези бар-чогу дээш оон-даа өске хынаар чүүлдер хөй болур.
Хамаатыларның, организацияларның азы күрүне албан черлериниң киирген хомудалынга даянгаш, хуу детективке хамаарыштыр пландан дашкаар хыналдаларны чорудуп болур. Ынчалза-даа чажыт хомудалдарны кичээнгейге албас.
Эжи дээш …
Шинчилел ажылдарын чорутканының түңнелинде российжилерниң 60 хуузу эжи дээш эзиртир суксундан ойталаарынга белен болган дээрзин Твинби мобильдиг капсырылга болгаш инсультка удур туржур фонд илереткен.
Бир эвес чаа таныжып турар эжи эзиртир суксунга багай хамаарылгалыг болза, херээжен улустуң 44 хуузу, а эр улустуң 47,3 хуузу эжи дээш арагадан ойталаарынга белен. Оон ыңай респондентилерниң 60 хуузу эжи арага ижерин эвээжедир азы шуут кааптар деп шиитпирлээр болза, өңнүүн идепкейлиг деткиир күзелин илереткен.
Ооң-биле чергелештир айтырыгга харыы бергеннерниң хөй кезии бир дугаар ужуражылга үезинде таарымчалыг байдал болгаш эптиг-чөптүг чугаалажыр арга деп харыылаарга, чүгле 4 хуузунга эзиртир суксун бир дугаар ужуражылгага чугула херек, а оларның 1 хуузу бирги ужуражылгаже эзиртир суксун бар болза, шуут келбес деп харыылаан.
/ А. ОНДАР белеткээн.
Медээлерни болгаш чуруктарны ТАСС-тан алган.
“Шын” №19 2026 чылдың май 21
"Шын" солуннуң МАХ-каналынга каттыжыңар max.ru/join/egenQ...