Республиканың культура бажыңнарынга болгаш төптерге Россияның эп-сеткил каттыштырылгазының хүнүнге тураскааткан 163 офлайн болгаш 21 онлайн хевирге янзы-бүрү хемчеглерни эрттирерин Республиканың улусчу чогаадылга болгаш дыштанылга төвү дыңнадып турар.
Культура албан черлериниң специалистери, чогаадыкчы коллективтер болгаш күүседикчилерниң киржилгези-биле, темалыг акцияларны, слайдылар көрүлдезин, уругларның чурук мөөрейлерин, номнар делгелгезин, мастер-класстар, квестер, флешмобтарны, темалыг мөөрейлер, кинолар көрүлдези дээш өске-даа хемчеглерни белеткеп турар.
Ол ышкаш Кызыл-Мажалыктың Культура бажыңынга, Ак-Довурактың Культура ордузунга «Демниг бис, ынчангаш найыралывыс быжыг» деп диаспораларның ужуражылгазын планнап турар. Аңаа школаларның интернационал класстарының киржилгези-биле «Бис аңгы бис, ынчалза-даа чаңгыс демниг бис!» деп национал танцылар база ажылчын коллективтерниң аразынга «Найыралдың кухнязы» деп национал аъш-чем делгелгезин организастаар. Чөөн-Хемчик кожуунга Россияның аңгы-аңгы чоннарының дылдарынга байыр чедирген этночелленджти база кожуун чергелиг «Россияның чаңгыс демниг чону» деп чоннар танцызының мөөрейин, Бии-Хем кожуунга национал культуралар байырлалын эрттирер.
Бо онзагай байырлалга тураскааткан хемчеглерниң тодаргай программазы-биле культура албан черлериниң социал четкилерде арыннарындан таныжып болур.
Республиканың улусчу чогаадылга болгаш дыштанылга төвүнүң медээлеринден.